ନୂଆଦିଲ୍ଲୀ : ନିର୍ଭୟା ଗଣ ବଳାତ୍କାର ଓ ହତ୍ୟା ମାମଲାରେ ୪ ଦୋଷୀଙ୍କୁ ମାର୍ଚ୍ଚ ୩ ତାରିଖରେ ଫାଶୀ ଦେବା ପାଇଁ କୋର୍ଟ ଡେଥ୍ ୱାରେଣ୍ଟ ଜାରି କରିଛନ୍ତି। ସେହିଦିନ ସକାଳ ୬ଟାରେ ଫାଶୀ ଦେବା ପାଇଁ ପଟିଆଲା କୋର୍ଟ ପକ୍ଷରୁ ସୋମବାର ଡେଥ୍ ୱାରେଣ୍ଟ ଜାରି କରାଯାଇଛି। ଏହାକୁ ମିଶାଇ ତୃତୀୟ ଥର ପାଇଁ ଡେଥ୍ ୱାରେଣ୍ଟ ଜାରି କରାଯାଇଛି।
ଏହି ନୂଆ ଡେଥ୍ ୱାରେଣ୍ଟ ବଳରେ ଦୋଷୀଙ୍କୁ ନିଶ୍ଚୟ ଫାଶୀ ମିଳିବ ବୋଲି ନିର୍ଭୟାଙ୍କ ମାଆ ଆଶା ଦେବୀ ନିଜ ପ୍ରତିକ୍ରିୟାରେ କହିଛନ୍ତି। ମାମଲାର ଶୁଣାଣି ସମୟରେ ଦୋଷୀମାନଙ୍କର ଓକିଲ ଏସ.ପି ସିଂହ ଅଦାଲତଙ୍କୁ ଅବଗତ କରାଇଥିଲେ ଯେ, ବିନୟ ଶର୍ମା ଫେବୃୟାରୀ ୧୧ ତାରିଖଠାରୁ ଜେଲରେ ଆମରଣ ଅନଶନ କରିଛି। ଅନ୍ୟ ପକ୍ଷରେ ମୁକେଶର ମାଆ ଆଜି ନିଜ ପୁଅ ପାଇଁ ନୂଆ ଓକିଲ ନିଯୁକ୍ତ କରିବା ପାଇଁ ଆବେଦନ କରିଥିଲେ। ଯାହା ଅନୁସାରେ ଏବେ ମୁକେଶ ପାଇଁ ରବି କାଜୀ ମାମଲା ପରିଚାଳନା କରିବେ। ସେ ମଧ୍ୟ ପବନର କେଶ ଲଢୁଛନ୍ତି।
ଅପରପକ୍ଷରେ ଅକ୍ଷୟ କୁମାର ସିଂହଙ୍କ ଓକିଲ ଏସ.ପି ସିଂହ କହିଛନ୍ତି ସେ ଅକ୍ଷୟ ପାଇଁ ନୂତନ କ୍ଷମା ଆବେଦନ ରାଷ୍ଟ୍ରପତିଙ୍କ ପାଖକୁ ପଠାଇବେ।
