ନୂଆଦିଲ୍ଲୀ : ଆରବ ସାଗରରେ ସୃଷ୍ଟି ହୋଇଥିବା “ତଉକତେ” ଘୂର୍ଣ୍ଣିଝଡ଼ର ମୁକାବିଲା କରିବାପାଇଁ ଜାତୀୟ ସଙ୍କଟ ପରିଚାଳନା କମିଟି (ଏନସିଏମସି)ର ଅଧ୍ୟକ୍ଷ କ୍ୟାବିନେଟ୍ ସଚିବ ରାଜୀବ ଗୌବା କେନ୍ଦ୍ର ଓ ରାଜ୍ୟ ମନ୍ତ୍ରଣାଳୟଗୁଡ଼ିକ ସହ ସମୀକ୍ଷା କରିଛନ୍ତି।
ଭାରତୀୟ ପାଣିପାଗ ବିଭାଗ ମହାନିର୍ଦ୍ଦେଶକ ଘୂର୍ଣ୍ଣବାତ୍ୟା ସଂକ୍ରାନ୍ତରେ ସବିଶେଷ ସୂଚନା ଦେବାକୁ ଯାଇ କହିଛନ୍ତି, ଆସନ୍ତା ମଙ୍ଗଳବାର ଦିନ ସକାଳେ ଏହା ଗୁଜରାଟ ଉପକୂଳରେ ପହଞ୍ଚିବ। ସେହି ସମୟରେ ୧୫୦ରୁ ୧୬୦ କିଲୋମିଟର୍ ବେଗରେ ପବନ ବହିବା ସଙ୍ଗେ ସଙ୍ଗେ ପ୍ରବଳ ବର୍ଷା ହେବାର ସମ୍ଭାବନା ରହିଛି। ଘୂର୍ଣ୍ଣିବାତ୍ୟାରେ ପ୍ରଭାବିତ ହେବାର ଆଶଙ୍କା ଥିବା ରାଜ୍ୟଗୁଡ଼ିକର ମୁଖ୍ୟ ସଚିବମାନଙ୍କ ସହ ପ୍ରସ୍ତୁତି ସଂକ୍ରାନ୍ତରେ ଆଲୋଚନା କରାଯାଇଛି। ରାଜ୍ୟଗୁଡ଼ିକରେ ପର୍ଯ୍ୟାପ୍ତ ପରିମାଣର ଖାଦ୍ୟଶସ୍ୟ, ପାନୀୟ ଜଳ ଓ ଅନ୍ୟାନ୍ୟ ଅତ୍ୟାବଶ୍ୟକ ସାମଗ୍ରୀ ଯୋଗାଣ ସାଙ୍ଗକୁ ବିଦ୍ୟୁତ୍ ଓ ଟେଲିଫୋନ୍ ସେବାକୁ ବଜାୟ ରଖିବା ଦିଗରେ ପ୍ରୟାସ କରିବାକୁ ରାଜ୍ୟମାନଙ୍କୁ ପରାମର୍ଶ ଦିଆଯାଇଛି।
ଜାତୀୟ ବିପର୍ୟ୍ୟୟ ମୁକାବିଲା ବାହିନୀ (ଏନଡିଆରଏଫ) ପକ୍ଷରୁ ପକ୍ଷରୁ ୭୯ଟି ଟିମ୍କୁ ମୁତୟନ କରାଯାଇଥିବାବେଳେ ୨୨ଟି ଟିମ୍କୁ ସଜାଗ ରଖାଯାଇଛି। ସେମାନଙ୍କ ନିକଟରେ ବୋଟ, ଗଛକଟା ଯନ୍ତ୍ର, ଟେଲିକମ୍ ଉପକରଣ ଆଦି ମହଜୁଦ ରଖାଯାଇଛି। ସେନା ବାହିନୀ, ନୌବାହିନୀ ଓ ଉପକୂଳରକ୍ଷୀ ବାହିନୀର ଉଦ୍ଧାରକାରୀ ରିଲିଫ୍ ଟିମ୍ ଗୁଡ଼ିକୁ ଡଙ୍ଗା, ବିମାନ ଓ ଜାହାଜ ସହ ସଜାଗ ରଖାଯାଇଛି। ଲୋକମାନଙ୍କୁ ନିରାପଦ ସ୍ଥାନକୁ ନେବାଲାଗି ବିଶେଷ ଧ୍ୟାନ ଦେବାକୁ ଶ୍ରୀ ଗୌବା ରାଜ୍ୟଗୁଡ଼ିକୁ ପରାମର୍ଶ ଦେଇଛନ୍ତି।
