କାବୁଲ : ଆଫଗାନିସ୍ତାନରେ ତାଲିବାନ ସରକାରର ଉପ-ପ୍ରଧାନମନ୍ତ୍ରୀ ମୁଲ୍ଲା ଅବଦୁଲ ଘନି ବରାଦର ନିଜ ମୃତ୍ୟୁ ସମ୍ପର୍କରେ ପ୍ରଚାରିତ ଖବରକୁ ଖଣ୍ଡନ କରିଛନ୍ତି। ବରାଦରଙ୍କ ସ୍ବର ଥିବା ଏ ସମ୍ପର୍କିତ ଏକ ଅଡିଓ ଟେପ୍କୁ ତାଲିବାନ ମୁଖପାତ୍ର ମହମ୍ମଦ ନଇମଙ୍କ ପକ୍ଷରୁ ଜାରି କରାଯାଇଛି; ଯେଉଁଥିରେ ସେ ଜୀବିତ ଓ ସୁସ୍ଥ ଥିବା ଏବଂ ତାଙ୍କ ମୃତ୍ୟୁ ସମ୍ପର୍କରେ ମିଛ ପ୍ରଚାର କରାଯାଉଥିବା ବରାଦର କହୁଥିବା ଶୁଣାଯାଉଛି। ରାଷ୍ଟ୍ରପତି ଭବନ ପରିସରରେ ତାଲିବାନର ଏକ ଗୋଷ୍ଠୀର ଆକ୍ରମଣରେ ବରାଦର ଗୁରୁତର ଆହତ ହୋଇ ମୃତ୍ୟୁମୁଖରେ ପଡ଼ିଥିବା ପ୍ରଚାର ହେବା ପରେ ସେ ଏଭଳି ସଫେଇ ଦେଇଛନ୍ତି। ଏପରି ଖବର ଭିତ୍ତିହୀନ ବୋଲି ତାଲିବାନର ନିଜସ୍ବ ସାମାଜିକ ଗଣମାଧ୍ୟମରେ ମଧ୍ୟ ପ୍ରଚାର କରାଯାଇଛି। ଅପରପକ୍ଷରେ ସୁସ୍ଥ ଥିବା ନେଇ ବରାଦର ନିଜେ ସର୍ବସାଧାରଣରେ ଉପସ୍ଥିତ ହୋଇ କହିବାକୁ କେତେକ ଦାବି କରିଛନ୍ତି। ସୂଚନାଯୋଗ୍ୟ ଯେ ତାଲିବାନ ସରକାର ଗଠନ ପୂର୍ବରୁ ଏହାକୁ ନେଇ ହକାନୀ ନେଟ୍ୱର୍କ ସହିତ ଚାଲିଥିବା ବିବାଦବେଳେ ବରାଦର ଗୁରୁତର ଅସୁସ୍ଥ ହୋଇ ପାକିସ୍ତାନକୁ ଚିକିତ୍ସା ପାଇଁ ଯାଇଥିବାର ଖବର ପ୍ରକାଶିତ ହୋଇଥିଲା। ପ୍ରଥମରୁ ତାଙ୍କୁ ପ୍ରଧାନମନ୍ତ୍ରୀ କରାଯିବା ନେଇ ପ୍ରଚାର ଚାଲିଥିଲେ ମଧ୍ୟ ପରେ ସେ ଉପ-ପ୍ରଧାନମନ୍ତ୍ରୀ ନିଯୁକ୍ତ ହୋଇଥିଲେ। ଏମିତିରେ ତାଲିବାନର ସର୍ବୋଚ୍ଚ ନେତା ହିବାତୁଲ୍ଲା ଅଖୁନ୍ଦଜାଦାଙ୍କର କିଛି ବର୍ଷ ପୂର୍ବେ ମୃତ୍ୟୁ ହୋଇଥିବାର ଖବର ମଧ୍ୟ ପ୍ରଚାର ହୋଇଥିଲା; କିନ୍ତୁ ତାଲିବାନ କ୍ଷମତା ଦଖଲ ସମୟରୁ ସେ କାନ୍ଦାହାରରେ ରହୁଥିବା ପ୍ରକାଶ।
Popular Categories
Previous article
Next article