ଜମ୍ମୁକାଶ୍ମୀରର ପ୍ରମୁଖ ରାଜନୈତିକ ଦଳର ନେତୃତ୍ବଙ୍କ ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ୩ ଘଣ୍ଟା ଧରି ଚାଲିଥିବା ଶେଷ ହୋଇଛି। ଆଜି ଅପରାହ୍ନରେ ପ୍ରଧାନମନ୍ତ୍ରୀଙ୍କ ବାସଭବନରେଏହି ବୈଠକ ବସିଥିଲା ଓ ସେଥିରେ ଜମ୍ମୁକାଶ୍ମୀରର ୧୪ ଜଣ ପ୍ରମୁଖ ନେତା ଯୋଗ ଦେଇଥିଲେ। ଏହି ଆଲୋଚନା କାଳରେ କଂଗ୍ରେସର ବରିଷ୍ଠ ନେତା ଗୁଲାମ ନବୀ ଆଜାଦ ୫ଟି ଦାବି ଉପସ୍ଥାପନ କରିଥିବା ଜଣାପଡିଛି।
ଆଜିର ବୈଠକରେ ଯେଉଁ ୫ଟି ପ୍ରମୁଖ ଦାବି ଉପସ୍ଥାପନ କରାଯାଇଛି ସେଗୁଡିକ ହେଉଛି, ରାଜ୍ୟ ମାନ୍ୟତା ଦେବା, ବିଧାନସଭା ନିର୍ବାଚନ କରାଇବା, କାଶ୍ମୀର ପଣ୍ଡିତମାନଙ୍କୁ ପୁନର୍ବାସ କରାଇବା ପାଇଁ ପଦକ୍ଷେପ ଗ୍ରହଣ କରିବା, ସମସ୍ତ ରାଜନୈତିକ ବନ୍ଦୀମାନଙ୍କୁ ଅବିଳମ୍ବେ ମୁକ୍ତ କରିବା ଓ ଅଧିବାସ ନିୟମ ସମ୍ପର୍କରେ ପୁନଃ ବିଚାର କରିବା।
ପିପୁଲ କନଫରେନ୍ସ ନେତା ମୁଜାଫର ହୁସେନ ବେଗ ବୈଠକକୁ ସୌହାର୍ଦ୍ଦ୍ୟପୂର୍ଣ୍ଣ ଓ ସକାରାତ୍ମକ ଥିଲା ବୋଲି କହିବା ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜମ୍ମୁକାଶ୍ମୀରରେ ଶାନ୍ତି ଫେରାଇ ଆଣିବା ଲାଗି ଯାହା ଆବଶ୍ୟକ ତାହା କରିବାକୁ ପ୍ରତିଶୃତି ଦେଇଥିବା କହିଛନ୍ତି। ବୈଠକରେ ଉପସ୍ଥିତ ଜମ୍ମୁକାଶ୍ମୀରର ସମସ୍ତ ନେତା ରାଜ୍ୟ ମାନ୍ୟତା ପାଇଁ ଦାବି କରିଛନ୍ତି। ପ୍ରଧାନମନ୍ତ୍ରୀ ମୋଦୀ ପ୍ରଥମେ ସୀମା ନିର୍ଦ୍ଧାରଣ ପ୍ରକ୍ରିୟା ଶେଷ ହେବା ପରେ ଅନ୍ୟାନ୍ୟ ସମସ୍ୟାର ସମାଧାନ ହେବ ବୋଲି କହିଥିବା ଶ୍ରୀ ବେଗ କହିଛନ୍ତି।
