ପାଲି(ରାଜସ୍ଥାନ) : ରାଜସ୍ଥାନ ଓ ତେଲଙ୍ଗାନା ବିଧାନସଭା ନିର୍ବାଚନ ପୂର୍ବରୁ କଂଗ୍ରେସକୁ ଟାର୍ଗେଟ କରିବା ନିମନ୍ତେ ବିଜେପିକୁ ଭଲ ପ୍ରସଙ୍ଗ ମିଳିଯାଇଛି। ଦୁର୍ନୀତି କାରଣରୁ ୨୦୧୪ରେ ଲୋକସଭା ନିର୍ବାଚନ ହାରିଥିବା କଂଗ୍ରେସ ଏବେ ପୁଣି ପୁରୁଣା ଦୁର୍ନୀତି ଜାଲରେ ଛନ୍ଦି ହୋଇପଡିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଗୁସ୍ତା ୱେଷ୍ଟଲ୍ୟାଣ୍ଡ ଦୁର୍ନୀତିକୁ ଆଧାର କରି କଂଗ୍ରେସକୁ ସମାଲୋଚନା କରିଛନ୍ତି। ମୋଦୀ କହିଛନ୍ତି ତାଙ୍କ ସରକାର କଂଗ୍ରେସ ନେତୃତ୍ୱାଧୀନ ୟୁପିଏ ସରକାର ସମୟରେ ହୋଇଥିବା ୩,୬୦୦ କୋଟି ଟଙ୍କାର ବହୁଚର୍ଚ୍ଚିତ ଭିଭିଆଇପି ହେଲିକପ୍ଟର କାରବାରର ମଧ୍ୟସ୍ଥ କ୍ରିଷ୍ଟିୟାନ ମିସେଲଙ୍କୁ ସୁଦୂର ଦୁବାଇରୁ ଭାରତ ପ୍ରତ୍ୟର୍ପଣ କରିବାରେ ସଫଳ ହୋଇଛି। ଆଗାମୀ ଦିନରେ ମିସେଲଙ୍କ ବୟାନରୁ ବହୁ ରାଜନେତାଙ୍କ ଗୁମର ଖୋଲିବ। ଏହି ଦୁର୍ନୀତି କାରବାର ସମ୍ବନ୍ଧରେ ସେ ପୂର୍ବରୁ ଅନେକବାର କହିଥିଲେ। ଏପରିକି ୟୁପିଏ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ଏକ ଚିଠି ପ୍ରସଙ୍ଗ ମଧ୍ୟ ସେ ଉଠାଇଥିଲେ। ବିଜେପି କ୍ଷମତାକୁ ଆସିବା ପରେ ଏହି କାରବାର ସମ୍ବନ୍ଧୀୟ କେତେକ ଫାଇଲ ଯାଞ୍ଚ କରିବାକୁ ଚାହିଁଥିଲା; ମାତ୍ର ସେମାନେ ସେଗୁଡିକକୁ ଲୁଚାଇ ଦେଇଥିଲେ। ଦୀର୍ଘ ଦିନ ପରେ ଏବେ ଏହି କାରବାରର ମଧ୍ୟସ୍ଥ ଧରାପଡିଛନ୍ତି ଯିଏକି ହେଲିକପ୍ଟର ଦୁର୍ନୀତିର ସମସ୍ତ ରହସ୍ୟ ଖୋଲିବେ ବୋଲି ମୋଦୀ କହିଛନ୍ତି। ମୋଦୀ ନ୍ୟାସନାଲ ହେରାଲ୍ଡ ପ୍ରସଙ୍ଗ ଉଠାଇଛନ୍ତି। ସେ କହିଛନ୍ତି, ଏହି ମାମଲାରେ ଗାନ୍ଧୀ ପରିବାର ବିରୋଧରେ ଆୟକର ଯାଞ୍ଚ ଜାରି ରହିବ ବୋଲି ସୁପ୍ରିମକୋର୍ଟ ରାୟ ଦେଇଛନ୍ତି। ଜଣେ ଚା’ବାଲାଙ୍କ ସାହସ ଯୋଗୁ ଏହା ସମ୍ଭବ ହୋଇଛି। ଚାରୋଟି ପିଢି ଧରି ଗାନ୍ଧୀ ପରିବାର ଐଶ୍ୱର୍ଯ୍ୟ ଭୋଗ କରୁଥିଲା। ଜଣେ ଚା’ବାଲାଙ୍କ ସାହାସ କାରଣରୁ ଏବେ ଏହାକୁ କୋର୍ଟ ଦ୍ୱାର ଦେଖିବାକୁ ପଡିଛି। ଏହା ସତ୍ୟର ବିଜୟ।
Popular Categories
Previous article
Next article