ବ୍ରହ୍ମପୁର: ଏମକେସିଜି ମେଡିକାଲ କଲେଜ ଓ ହସ୍ପିଟାଲ କରୋନା ୱାର୍ଡରେ ବୁଧବାର ସକାଳେ ଜଣେ ସନ୍ଦିଗ୍ଧ ରୋଗୀଙ୍କ ମୃତ୍ୟୁ ହୋଇଛି । ରୋଗୀ ଜଣଙ୍କ କିଛିଦିନ ତଳେ ତାମିଲନାଡୁରୁ ଫେରିଥିବା ବେଳେ ଏମକେସିଜିରେ ଗତକାଲି ରାତିରେ ଭର୍ତ୍ତି ହୋଇଥିଲେ । ହେଲେ ତାଙ୍କ ସ୍ୱାବ ନମୁନା ପରୀକ୍ଷା ପୂର୍ବରୁ ହିଁ ତାଙ୍କର ମୃତ୍ୟୁ ହୋଇଥିବାରୁ ଘଟଣା ଅଧିକ ଉଲ୍ଲେଖନୀୟ ହୋଇପଡିଛି ।
ସୂଚନା ଅନୁଯାୟୀ, ଗଞ୍ଜାନ ଜିଲା ଭଞ୍ଜନଗର ଅଞ୍ଚଶର ୩୧ ବର୍ଷୀୟ ଯୁବକ ଅନେକ ଦିନ ହେବ ତାମିଲନାଡୁରେ ରହୁଥିବା ବେଳେ ଟିବି ରୋଗରେ ପୀଡିତ ହୋଇ ସେଠାକାର ଏକ ହସ୍ପିଟାଲରେ ଚିକିତ୍ସିତ ହେଉଥିଲେ । ଆଜକୁ ୫ ଦିନ ତଳେ ଏକ ଆମ୍ବୁଲାନ୍ସ ଯୋଗେ ସେ ନିଜ ଗାଁକୁ ଚାଲି ଆସିଥିଲେ । ଗାଁ ରେ ସ୍ଵାସ୍ଥ୍ୟ ବିଗିଡିବାରୁ ପରିବାର ଲୋକେ ତାଙ୍କୁ ଗତକାଲି ରାତିରେ ଏମକେସିଜିକୁ ଆଣିଥିଲେ । ଯେହେତୁ ବ୍ୟକ୍ତିଙ୍କ ଠାରେ କାଶ ସହ ଅନ୍ୟ ଲକ୍ଷଣ ଅଛି ଡାକ୍ତରମାନେ ତାଙ୍କୁ କଜୁଆଲିଟିର ଉପର ମହଲାରେ ଥିବା କରୋନା ଆଇସଲେସନ କକ୍ଷରେ ଭର୍ତ୍ତି କରିଥିଲେ । ଆଉ ଆଜି ତାଙ୍କର ସ୍ୱାବ ନମୁନା ସଂଗ୍ରହ ହେବାର ଥିଲା। କିନ୍ତୁ ରାତି ପହିବା ବେଳକୁ ଯୁବକ ଜଣକ ଆଖି ବୁଜିଦେଇଥିଲେ । ତାଙ୍କ ମୃତ୍ୟୁ ପରେ ଶବକୁ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି । ଯୁବକଙ୍କ ଠାରେ ପୂର୍ବରୁ ଟିବି ରୋଗ ଥିବାରୁ ସେ ସେହି ରୋଗରେ ହିଁ ମାରିଥିବା ଅନୁମାନ କରାଯାଉଛି ବୋଲି ଏମକେସିଜି ମେଡିକାଲ ସୁପରିଟେଣ୍ଡେଣ୍ଟ ପ୍ରଫେସର ସନ୍ତୋଷ ମିଶ୍ର କହିଛନ୍ତି ।
