ମୁମ୍ବଇ: ଗୁଜରାଟ ପରେ ମହାରାଷ୍ଟ୍ରରେ କଂଗ୍ରେସକୁ ଶକ୍ତ ଧକ୍କା ଲାଗିଛି। ନିର୍ବାଚନ ପୂର୍ବରୁ ଜଣକ ପରେ ଜଣେ ବରିଷ୍ଠ ନେତା ଦଳ ହାତ ଛାଡ଼ିବାରେ ଲାଗିଛନ୍ତି। ଏହି କ୍ରମରେ ମହାରାଷ୍ଟ୍ରର ବରିଷ୍ଠ ନେତା ତଥା ବିରୋଧୀ ଦଳ ନେତା ରାଧାକୃଷ୍ଣ ବିଖେ ପାଟିଲଙ୍କ ପୁଅ ସୁଜୟ ବିଖେ ପାଟିଲ କଂଗ୍ରେସ ଛାଡ଼ି ମଙ୍ଗଳବାର ବିଜେପିରେ ସାମିଲ ହୋଇଛନ୍ତି। ମୁମ୍ବଇରେ ବିଜେପିର ଏକ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବିସଙ୍କ ଉପସ୍ଥିତିରେ ସୁଜୟ ବିଜେପିରେ ଯୋଗଦେଇଛନ୍ତି।
ସୂଚନା ମୁତାବକ, ମହାରାଷ୍ଟ୍ରରେ ଏନସିପି ସହ କଂଗ୍ରେସ ମେଣ୍ଟ କରିଛି। ଅହମଦନଗର ଲୋକ ସଭା ଆସନରୁ ସୁଜୟ ନିର୍ବାଚନ ଲଢ଼ିବାକୁ ଏନସିପି ମୁଖ୍ୟ ଶରଦ ପାୱାରଙ୍କୁ ଅନୁରୋଧ କରିଥିଲେ। କିନ୍ତୁ ପାୱାର ସୁଜୟଙ୍କ ଆବେଦନକୁ ପ୍ରତ୍ୟାଖ୍ୟାନ କରିଥିଲେ। ଏହାପରେ ସେ ବିଜେପିରେ ଯୋଗଦେଇଛନ୍ତି। ପିଟିଆଇ ସୂତ୍ରରୁ ଜଣାପଡ଼ିଛି ଯେ, ସୁଜୟଙ୍କ ବାପା ରାଧାକୃଷ୍ଣ ଏନସିପି ମୁଖ୍ୟ ଶରଦ ପାୱାରଙ୍କୁ ଭେଟି ତାଙ୍କ ପୁଅ ସମ୍ପର୍କରେ ଆଲୋଚନା କରିଥିଲେ। କିନ୍ତୁ ଉକ୍ତ ସିଟ୍ ଏନସିପିର, ତାହା କାହାକୁ ଦିଆଯିବ ନାହିଁ ବୋଲି ପାୱାର ସଫା ସଫା କହିଦେଇଥିଲେ।
