ନୂଆଦିଲ୍ଲୀ : ବଜେଟ୍ ଉପସ୍ଥାପନର ଅବ୍ୟବହିତ ପୂର୍ବରୁ କମିଛି ଏଲପିଜି ସିଲିଣ୍ଡର ଦର। ଉଭୟ ରିଆତି ଏବଂ ଅଣ-ରିଆତି ସିଲିଣ୍ଡର ମୂଲ୍ୟରେ ଏହି ହ୍ରାସ ଘଟାଯାଇଛି। ଏଥିଯୋଗୁ ରାଜଧାନୀ ନୂଆଦିଲ୍ଲୀରେ ରିଆତି ଯୁକ୍ତ ୧୪.୨ କେଜି ଏଲ୍ପିଜି ସିଲିଣ୍ଡର ପିଛା ଦର ୧ ଟଙ୍କା ୪୬ ପଇସା ହ୍ରାସ ଘଟି ୪୯୩ ଟଙ୍କା ୫୩ ପଇସା ହୋଇଛି । ପୂର୍ବରୁ ଏହା ସିଲିଣ୍ଡର ପିଛା ୪୯୪ ଟଙ୍କା ୫୩ ପଇସା ରହିଥିଲା। ସେହିଭଳି ଅଣ-ରିଆତି ସିଲିଣ୍ଡର ମୂଲ୍ୟ ୩୦ ଟଙ୍କା ହ୍ରାସ ଘଟି ସିଲିଣ୍ଡର ପିଛା ୬୫୯ ଟଙ୍କାରେ ପହଞ୍ଚିଛି । ନୂଆ ଦର ଗୁରୁବାର ମଧ୍ୟରାତ୍ରରୁ ଲାଗୁ ହେଇଛି । ଅନ୍ତଃରାଷ୍ଟ୍ରୀୟ ବଜାରରେ ଏଲ୍ପିଜି ଦର ହ୍ରାସ ଏବଂ ଆମେରିକୀୟ ଡଲାର ତୁଳନାରେ ଟଙ୍କାର ବିନିମୟ ମୂଲ୍ୟ ଦୃଢ ରହିବା ଫଳରେ ଏଲ୍ପିଜି ମୂଲ୍ୟରେ ଏହି ହ୍ରାସ ଘଟିଛି । ସୂଚନାଯୋଗ୍ୟ ଚଳିତମାସ ପହିଲାରେ ଅଣ-ରିଆତି ସିଲିଣ୍ଡର ମୂଲ୍ୟରେ ୧୨୦ ଟଙ୍କା ଏବଂ ଗତବର୍ଷ ଡିସେମ୍ବରରେ ୧୩୩ ଟଙ୍କା ହ୍ରାସ ଘଟିଥିଲା।
ଏହାର ପ୍ରଭାବରେ ରାଜଧାନୀ ଭୁବନେଶ୍ୱରରେ ଅଣ-ରିଆତି ଏଲ୍ପିଜି ସିଲିଣ୍ଡର ପିଛା ୩୦ ଟଙ୍କା ୫୦ ପଇସା ହ୍ରାସ ଘଟିଛି । ତଦନୁସାରେ, ଘରୋଇ ଏଲ୍ପିଜି ଉପଭୋକ୍ତାଙ୍କ ଦ୍ୱାରା ଅଗ୍ରିମ ନଗଦ କାରବାରରେ ମଧ୍ୟ ସିଲିଣ୍ଡର ପିଛା ୩୦ ଟଙ୍କା ୫୦ ପଇସା ହ୍ରାସ ଘଟିବ। ଘରୋଇ ଏଲ୍ପିଜି ଉପଭୋକ୍ତାଙ୍କୁ ବର୍ତ୍ତମାନ ସିଲିଣ୍ଡର ପିଛା ୭୧୬ ଟଙ୍କା ୫୦ ପଇସା ବଦଳରେ ୬୮୬ ଟଙ୍କା ପଇଠ କରିବାକୁ ପଡ଼ିବ। ସେହିଭଳି ଘରୋଇ ରିଆତି ଏଲ୍ପିଜି ସିଲିଣ୍ଡର ପିଛା ଦର ୧ ଟଙ୍କା ୪୯ ହ୍ରାସ ଘଟିଛି।
କମିଲା ଏଲପିଜି ଦର
Popular Categories
Previous article
Next article