ଖପ୍ରାଖୋଲ:ଖପ୍ରାଖୋଲ ବ୍ଲକ ମାଲପଡା ପଞ୍ଚାୟତ ଅନ୍ତର୍ଗତ ଜାମଚୁଆଁ ଗ୍ରାମର କୈଳାଶ ସାହୁଙ୍କ ଘରେ ନିଆଁ ଲାଗିଯିବା ଫଳରେ ୨ବଖରା ଖପର ଘର ସମ୍ପୂର୍ଣ୍ଣ ପୋଡି ଯାଇଛି। ଏଥି ସହିତ ଲକ୍ଷାଧିକ ଟଙ୍କାର ସମ୍ପତ୍ତି ପୋଡି ପାଉଁଶ ହୋଇଯାଇଛି।
ରବିବାର ସକାଳେ ଘରର ଲୋକ ବଗିଚାରେ କାମ କରୁଥିବା ବେଳେ ଘର ବନ୍ଦ ରହିଥିଲା। ଏହି ସମୟରେ ହଠାତ୍ ଘରେ ନିଆଁ ଲାଗିଯାଇଥିଲା। ଗ୍ରାମବାସୀ ନିଆଁ ଲିଭାଇବାକୁ ଉଦ୍ୟମ କରିଥିଲେ ମଧ୍ୟ ଚାରିଆଡକୁ ନିଆଁ ବ୍ୟାପୀ ଯାଇଥିଲା। ଖପ୍ରାଖୋଲ ଦମକଳ ବାହିନୀ ପହଂଚି ନିଆଁକୁ ଆୟତ୍ତ କରିଥିଲା। ସଟ୍ ସର୍କିଟ ଯୋଗୁଁ ଅଗ୍ନିକାଣ୍ଡ ହୋଇଥିବା ନେଇ ସନ୍ଦେହ କରାଯାଉଛି। ଅଗ୍ନିକାଣ୍ଡରେ ଘରେ ଥିବା ଦୁଇଟି ଯାକ ପଲଙ୍କ, ଡ୍ରେସିଂ ଟେବୁଲ, ଫ୍ରିଜ, ଗଡ୍ରେଜ,ଟିଭି, ଟେବୁଲ ପଙ୍ଖା, ସିଲେଇ ମେସିନ ଆଦି ସମସ୍ତ ଆସବାବପତ୍ର ପୋଡି ପାଉଁଶ ହୋଇଯାଇଥିବା ବେଳେ ନଗଦ ୪୦ ହଜାର ଟଙ୍କା ପୋଡି ପାଉଁଶ ହୋଇଯାଇଛି।
ଘର ଲୋକଙ୍କର ଆଧାର କାର୍ଡ, ଭୋଟର ପରିଚୟ ପତ୍ର, ବ୍ୟାଙ୍କ ପାସବୁକ୍ ବିଭିନ୍ନ ପ୍ରମାଣ ପତ୍ର ପୋଡିଯାଇଥିବା ନେଇ ପରିବାର ପକ୍ଷରୁ ପୁଲିସ ନିକଟରେ ଅଭିଯୋଗ ହୋଇଛି। ଲାଠୋର ଥାନା ଅଧିକାରୀ ଧର୍ମେନ୍ଦ୍ର ଶାନ୍ତି ଘଟଣା ସ୍ଥଳ ପରିଦର୍ଶନ କରିଛନ୍ତି। ଲାଠୋର ସରପଂଚ ପ୍ରବୀଣ ଅଗ୍ରୱାଲ ପରିବାର ଲୋକଙ୍କୁ ଭେଟିବା ସହିତ ଚାଉଳ, ଡାଲି, ଆଳୁ ରାସନ ସାମଗ୍ରୀ ସହିତ ଆର୍ଥିକ ସହାୟତା ପ୍ରଦାନ କରିଛନ୍ତି। ଏଥି ସହିତ ସରକାରୀ ସହାୟତା ଯୋଗାଇଦେବା ପାଇଁ ଖପ୍ରାଖୋଲ ତହସିଲଦାରଙ୍କ ନିକଟରେ ଦାବି କରିଛନ୍ତି।
