ଆୟକର ବିଭାଗ ଦିଲ୍ଲୀ ଓ ଜାତୀୟ ରାଜଧାନୀ ଅଞ୍ଚଳ, ହରିୟାଣା, ପଞ୍ଜାବ, ଉତ୍ତରାଖଣ୍ଡ ଓ ଗୋଆର ବିଭିନ୍ନ ସ୍ଥାନରେ ଚଢ଼ଉ କରିଛି। ଏହି ଚଢ଼ଉ ଅଭିଯାନରେ ଖାନତଲାସି କରାଯିବା ସହ ବହୁ ପଦାର୍ଥ ଜବତ କରାଯାଇଛି। କିଛିଲୋକ ନକଲି ବିଲିଂ ମାଧ୍ୟମରେ ବହୁ ଅର୍ଥ ଜମା କରିବା ଓ ଅନ୍ୟାନ୍ୟ ବେଆଇନ କାର୍ଯ୍ୟରେ ସଂପୃକ୍ତ ଥିବାର ଜଣାପଡ଼ିବା ପରେ ଆୟକର ବିଭାଗ ଦ୍ୱାରା ଏଭଳି ଚଢ଼ଉ କରାଯାଇଥିଲା। ସର୍ବମୋଟ୍ ୪୨ଟି ପରିସରରେ ଖାନତଲାସୀ କରାଯାଇଛି।
ଖାନତଲାସୀ ସମୟରେ ଏହିସବୁ କାର୍ଯ୍ୟ ସହ ସଂପୃକ୍ତ ବ୍ୟକ୍ତି ଓ ମଧ୍ୟସ୍ଥମାନଙ୍କ ସମ୍ବନ୍ଧୀୟ ପ୍ରମାଣ, ଅର୍ଥ କାରବାର କରୁଥିବା ବ୍ୟକ୍ତିମାନଙ୍କର ନାମ, ଏହି ସବୁ କାର୍ଯ୍ୟର ଲାଭ ପାଇଥିବା ବ୍ୟକ୍ତିବିଶେଷଙ୍କର ନାମ ଓ କିଛି ଫାର୍ମର ନାମ ପଦାକୁ ଆସିଛି। ୫ଶହ କୋଟି ଟଙ୍କା ସମ୍ବଳିତ କାରବାର ସମ୍ବନ୍ଧୀୟ ଦସ୍ତାବିଜଗୁଡ଼ିକୁ ଜବତ କରାଯାଇଛି। ବହୁ ନକଲି କମ୍ପାନି ସମ୍ପର୍କରେ ଜଣାପଡ଼ିଛି ଓ ନକଲି ବିଲ୍ ଜରିଆରେ ବହୁ ପରିମାଣର ହିସାବ ବହିର୍ଭୁତ ନଗଦ ଅର୍ଥ ଉଠାଣ ବିଷୟରେ ପ୍ରମାଣ ହସ୍ତଗତ ହୋଇଛି। ସେହି ନକଲି କମ୍ପାନିଗୁଡ଼ିକରେ ବିଭିନ୍ନ ନକଲି କର୍ମଚାରୀମାନଙ୍କର ନାମ ଓ ଠିକଣା ପ୍ରଭୃତି ଥିବାର ପ୍ରମାଣ ମିଳିଛି ଓ ସେମାନଙ୍କ ନାମରେ ବିଭିନ୍ନ ବ୍ୟାଙ୍କ ଆକାଉଣ୍ଟ ଖୋଲାଯାଇ ଅର୍ଥ କାରବାର କରାଯାଇଛି। ସେହିଭଳି ନକଲୀ କର୍ମଚାରୀ, ଅଂଶୀଦାର ଓ ଅର୍ଥ କାରବାର କରୁଥିବା ବ୍ୟକ୍ତିମାନଙ୍କର ବୟାନ ରେକର୍ଡ କରାଯାଇଛି।
