ନୂଆଦିଲ୍ଲୀ: ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ୫ ମ୍ୟାଚ ବିଶିଷ୍ଟ ଦିନିକିଆ ସିରିଜର ଅନ୍ତିମ ମ୍ୟାଚ ଆଜି ଦିଲ୍ଲୀର ଫିରୋଜଶାହ କୋଟଲା ପଡ଼ିଆରେ ଖେଳାଯିବ। ଲଗାତର ୨ଟି ମ୍ୟାଚ ଜିତିବା ପରେ ଅଷ୍ଟ୍ରେଲିଆ ଖେଳାଳିଙ୍କ ମନୋବଳ ଦୃଢ଼ ରହିଛି। ଅନ୍ୟପଟେ ଭାରତ ଏବଂ ଅଷ୍ଟ୍ରେଲିଆ ୨ଟି ଲେଖାଏ ମ୍ୟାଚ ଜିତିଥିବାରୁ ଅନ୍ତିମ ମ୍ୟାଚ ନିର୍ଣ୍ଣାୟକ ଭୂମିକା ଗ୍ରହଣ କରିବ। ଯେଉଁ ଦଳ ଶେଷ ମ୍ୟାଚ ଜିତିବ ସେ ସିରିଜ ହାତେଇବ।
ଏହାମଧ୍ୟରେ କୋଟଲା ଗ୍ରାଉଣ୍ଡରେ ପୂର୍ବରୁ ଖେଳାଯାଇଥିବା ୧୦ଟି ମ୍ୟାଚରେ ଭାରତ ୬ଥର ବିଜୟୀ ହୋଇଛି। ୨ଟି ମ୍ୟାଚ ହାରିଥିବାବେଳେ ଗୋଟିଏ ଡ୍ର ରହିଛି ଏବଂ ଆଉ ଗୋଟିଏ ମ୍ୟାଚ ରଦ୍ଦ ହୋଇଛି। ଏହି ସଂଖ୍ୟାକୁ ତୁଳନା କଲେ କୋଟଲାରେ ଭାରତର ସ୍ଥିତି ଭଲ ରହିଛି। ତେଣୁ ଦଳ ଅଷ୍ଟ୍ରେଲିଆ ଉପରେ ଭାରି ପଡ଼ିପାରେ ବୋଲି କ୍ରିକେଟ ବିଶେଷଜ୍ଞମାନେ ମତ ଦେଉଛନ୍ତି। ମାତ୍ର କ୍ରିକେଟ ଖେଳରେ ଅନିଶ୍ଚିତତା ରହିଛି। କିଏ ଜିତିବ, କିଏ ହାରିବ ତାହା ପୂର୍ବାନୁମାନ କରିବା ମୁସ୍କିଲ।
ତେବେ କୋଟଲାରେ ଭାରତ ଏବଂ ଅଷ୍ଟ୍ରେଲିଆର ସ୍ଥିତିକୁ ଦେଖିଲେ ଭାରତର ପଲା ଭାରି ରହିଛି। ଉଭୟ ଟିମ୍ ମଧ୍ୟରେ ଏଠାରେ ୪ଟି ମ୍ୟାଚ୍ ଖେଳାଯାଇଛି। ସେଥିରୁ ୩ଟି ମ୍ୟାଚରେ ଭାରତ ଜିତିଛି। ଅଷ୍ଟ୍ରେଲିଆ ଗୋଟିଏ ଥର ବିଜୟୀ ହେବାରେ ସକ୍ଷମ ହୋଇଛି। ୧୯୮୬ରେ ଏଠାରେ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ପ୍ରଥମ ଦିନିକିଆ ଖେଳାଯାଇଥିଲା। ଏଥିରେ ଭାରତ ୩ ଉଇକେଟରେ ବିଜୟୀ ହୋଇଥିଲା। ଏହା ପରେ ୧୯୮୭ରେ ଖେଳାଯାଇଥିବା ୨ୟ ମ୍ୟାଚରେ ଭାରତ ୫୬ ରନରେ ଅଷ୍ଟ୍ରେଲିଆକୁ ପରାସ୍ତ କରିଥିଲା। ମାତ୍ର ୧୯୯୮ରେ ଖେଳାଯାଇଥିବା ୩ୟ ମ୍ୟାଚରେ ଅଷ୍ଟ୍ରେଲିଆ ୪ ଉଇକେଟରେ ଭାରତକୁ ହରାଇଥିଲା। ଉଭୟ ଦେଶ ମଧ୍ୟରେ ଶେଷଥର ୨୦୦୯ରେ ଏଠାରେ ମ୍ୟାଚ ଅନୁଷ୍ଠିତ ହୋଇଥିଲା, ଯେଉଁଥିରେ ଭାରତ ବିଜୟ ହାସଲ କରିଥିଲା।
ଶେଷ ମ୍ୟାଚ ହାରିଥିଲା ଭାରତ
ଭାରତ ଶେଷ ଥର ପାଇଁ ୨୦୧୬ରେ ଏଠାରେ ନ୍ୟୁଜିଲାଣ୍ଡ ବିପକ୍ଷରେ ମ୍ୟାଚ ଖେଳିଥିଲା। ଏଥିରେ ଭାରତ ୬ ରନରେ ହାରିଥିଲା। ଏହା ପୂର୍ବରୁ ଭାରତୀୟ ଟିମ୍ ଏଠାରେ ଲଗାତାର ୪ଟି ମ୍ୟାଚରେ ବିଜୟୀ ହୋଇଥିଲା।
