ସମାଜ ଡିଜିଟାଲ ଡେସ୍କ: ଭାରତର ସମସ୍ତ ପ୍ରୟାସ ସତ୍ୱେ ବାଂଲାଦେଶ ସୀମାରେ ଅପ୍ରୀତିକରଣ ପରିସ୍ଥିତି ଥମିବାର ନାଁ ନେଉନାହିଁ। ଭାରତ-ବାଂଲାଦେଶ ସୀମା ଜଙ୍ଗଲ ଏବଂ ପର୍ବତ ଘେରା। ଘଞ୍ଚ ଜଙ୍ଗଲ ଯୋଗୁ ସୁରକ୍ଷାବାହିନୀ ନିରନ୍ତର ପାଟ୍ରୋଲିଂ କରିବା କଷ୍ଟକର। ଦୁଇ ଦେଶ ମଧ୍ୟରେ ବାଣିଜ୍ୟ କାରବାର ଖୋଲା ରହିଛି। ପରିବହନ ପାଇଁ ଟ୍ରକ୍ ଏବଂ ସାଧାରଣ ଯାନବାହାନ ଭାରତ ଓ ବାଂଲାଦେଶକୁ ସଡ଼କ ପଥରେ ଯାତାୟତ କରୁଛି। ଏଥିପାଇଁ ସୁରକ୍ଷାବାହିନୀ ଏହି ମାର୍ଗ ଉପରେ ତୀକ୍ଷ୍ଣ ନଜର ରଖିଥାନ୍ତି। ଯାତାୟତ କରୁଥିବା ଗାଡିଗୁଡିକର ସଠିକ୍ ଭାବେ ଯାଞ୍ଚ କରିବା ପରେ ସୀମା ଭିତରେ ପ୍ରବେଶ କରାଉଛନ୍ତି ସୁରକ୍ଷାବାହିନୀ। ନିକଟରେ ସୀମାରେ ଯାଞ୍ଚ ବେଳେ ବିଏସଏଫ ଯବାନ ମାନେ ଏକ ଟ୍ରକ ଏବଂ ଅନ୍ୟ ଗାଡିକୁ ଅଟକାଇଥିଲେ। ଗାଡିର ଚେକିଂ କରିବା ପାଇଁ ଯେତେବେଳେ ସଟର ଖୋଲିଲେ ଭିତରର ଦୃଶ୍ୟ ଦେଖି ସୁରକ୍ଷାବହିନୀ ଚକିତ ହେବା ସହ କଣ କରିବେ କିଛି ଭାବି ପାରିନଥିଲେ।
ମିଳିଥିବା ସୂଚନା ଅନୁସାରେ ପଶ୍ଚିମବଙ୍ଗର ଉତ୍ତର ୨୪ ପରଗାନା ଜିଲାର ପେଟ୍ରାପୋଲରେ ଭାରତ-ବାଂଲାଦେଶ ସୀମା ଦେଇ ୨.୨୫କୋଟି ଟଙ୍କାର ସୁନା ଚୋରା ଚାଲାଣ ହେଉଥିଲା। ଏଥିରେ ସଂପୃକ୍ତ ତିନି ଜଣଙ୍କୁ ଗିରଫ କରାଯାଇଛି। ସୀମା ସୁରକ୍ଷାବାହିନୀର ଜଣେ ଅଧିକାରୀ ଏହି ସୂଚନା ଦେଇଛନ୍ତି। ଟ୍ରକରୁ ବହୁ ପରିମାଣର ସୁନା ବିସ୍କୁଟ ଜବତ ହେବା ସହ ଅନ୍ୟ ଏକ ଗାଡିକୁ ଧରିଥିଲେ ଯବାନ। ଯେଉଁଥିରେ ଲକ୍ଷ ଲକ୍ଷ ଟଙ୍କାର ସୁନା ଜବତ ହୋଇଥିଲା। ଏହାସହିତ ଜିଲାର ପୃଥକ ପୃଥକ ସ୍ଥାନରେ ବିଏସଏଫ ଯବାନ ମାନେ ବାଂଲାଦେଶରୁ ଭାରତକୁ ପ୍ରବେଶ କରୁଥିବା ଟ୍ରକ ଗୁଡିକୁ ଯାଞ୍ଚ କରି ଗୋଟିଏ ଗାଡିରୁ ୧.୫୮କୋଟି ଟଙ୍କାର ୨.୫କିଲୋଗ୍ରାମ ସୁନା ବିସ୍କୁଟ ଜବତ କରିଛନ୍ତି। ଏଥିରେ ଦୁଇ ଜଣଙ୍କୁ ଗିରଫ କରାଯାଇଛି।
ସେହିପରି ପଶିମବଙ୍ଗ ହାୱଡା ଜିଲାରେ ୧୦୨ କିଲୋ ଗଞ୍ଜେଇ ଜବତ ସହ ୫ଜଣଙ୍କୁ ଗିରଫ କରିଛି ପୁଲିସ। ଓଡ଼ିଶାରୁ ପିଆଜ ବୋଝେଇ ଏକ ଟ୍ରକ ଯାଉଥିବା ବେଳେ ଅଟକାଇଥିଲା ପୁଲିସ। ଗାଡିରୁ ପ୍ରାୟ ୫୦ଲକ୍ଷ ଟଙ୍କାର ଗଞ୍ଜେଇ ଜବତ ହୋଇଥିଲା। ଏସବୁ ଘଟଣାର ତଦନ୍ତ ଜାରି ରହିଛି।
