ସମାଜ ଡିଜିଟାଲ ଡେସ୍କ: ଗାଡ଼ି ପାର୍କିଂକୁ କେନ୍ଦ୍ର କରି ଜଣେ ବୈଜ୍ଞାନିକଙ୍କୁ ହତ୍ୟା କରାଯାଇଛି। ପଞ୍ଜାବର ମୋହାଲି ଅନ୍ତର୍ଗତ ସେକ୍ଟର ୬୬ରେ ଏହି ହତ୍ୟାକାଣ୍ଡ ଘଟିଛି। ହତ୍ୟାର ଶିକାର ହୋଇଛନ୍ତି ୩୯ ବର୍ଷୀୟ ଅଭିଶେକ ସ୍ବର୍ଣ୍ଣକାର। ସେ ଇଣ୍ଡିଆନ ଇଷ୍ଟିଚ୍ୟୁଟ ଅଫ ସାଇନ୍ସ ଏଜୁକେଶନ ଆଣ୍ଡ ରିସର୍ଚ୍ଚ(ଆଇଜର)ରେ ବୈଜ୍ଞାନିକ ଭାବେ କାର୍ଯ୍ୟ କରୁଥିଲେ।
ଅଭିଶେକଙ୍କ ଘର ଝାଡ଼ଖଣ୍ଡରେ। ସେ କିଡନୀଜନିତ ରୋଗରେ ଆକ୍ରାନ୍ତ ଥିଲେ। ନିକଟରେ ତାଙ୍କର କିଡନୀ ପ୍ରତିରୋପଣ ହୋଇଥିଲା ଏବଂ ଡାୟାଲିସିସରେ ରହିଥିଲେ। ତାଙ୍କର ଜଣେ ଭଉଣୀ ତାଙ୍କୁ କିଡନୀ ଦାନ କରିଥିଲେ। ମୋହାଲିରେ ଏକ ଭଡ଼ା ଘରେ ସେ ପରିବାରର ଅନ୍ୟ ସଦସ୍ୟଙ୍କ ସହିତ ରହୁଥିଲେ। ମଙ୍ଗଳବାର ରାତିରେ ଘର ନିକଟରେ ଗାଡ଼ି ପାର୍କିଂକୁ କେନ୍ଦ୍ର କରି ସ୍ଥାନୀୟ ମଣ୍ଟି ନାମକ ଯୁବକ ତାଙ୍କୁ ନିର୍ଦୟ ଭାବେ ଆକ୍ରମଣ କରିଥିଲେ। ଅଭିଶେକଙ୍କ ଦେହ ଖରାପ ଥିବା ଜାଣି ମଧ୍ୟ ମଣ୍ଟି ତାଙ୍କୁ ଆକ୍ରମଣ କରିଥିଲେ। ଅଭିଶେକ ଚେତା ହରାଇବା ପରେ ମଣ୍ଟି ଭୟଭୀତ ହୋଇପଡ଼ିଥିଲେ ଏବଂ ତୁରନ୍ତ ତାଙ୍କୁ ନିଜ କାରରେ ଡାକ୍ତରଖାନା ନେଇଥିଲେ। ହେଲେ ସେଠାରେ ପହଞ୍ଚିବା ବେଳକୁ ଅଭିଶେକଙ୍କ ମୃତ୍ୟୁ ହୋଇସାରିଥିଲା। ଏହି ଘଟଣାରେ ପୁଲିସ ତଦନ୍ତ ଚଳାଇଛି।
