ଟିଟିଲାଗଡ଼ : ଟିଟିଲାଗଡ ଥାନା ଅନ୍ତର୍ଗତ ଗୁର୍ଜିଭଟା ଗ୍ରାମରେ ଏକ ସଂଘବଦ୍ଧ ଆକ୍ରମଣ ଘଟଣାରେ ଜନୈକ ଯୁବକ ଗୁରୁତର ହୋଇପଡିଛନ୍ତି। ତାଙ୍କୁ ବିଶାଖାପାଟଣା ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି। ପରିବାର ଲୋକେ ଏନେଇ ଟିଟିଲାଗଡ ଥାନାର ଦ୍ୱାରସ୍ଥ ହୋଇଥିଲେ ହେଁ ଦୋଷୀ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରି ନ ଥିବା ଅଭିଯୋଗ ହୋଇଛି। ଗତ ୩ ତାରିଖ ସନ୍ଧ୍ୟାରେ ଗୁର୍ଜିଭଟା ଗ୍ରାମର ୫ ଜଣ ବ୍ୟକ୍ତି ଗ୍ରାମର ଗୁରେ ଭୋଇଙ୍କ ପୁତ୍ର ମୀନକେତନ ଭୋଇ (୨୬)ଙ୍କ ଉପରେ ଠେଙ୍ଗା ସାହାଯ୍ୟରେ ସଂଘବଦ୍ଧ ଆକ୍ରମଣ କରିଥିଲେ। ଆକ୍ରମଣରେ ମୀନକେତନ ଗୁରୁତର ହୋଇପଡିଥିଲେ। ତାଙ୍କ ମୁଣ୍ଡରେ ଗଭୀର ଆଘାତ ଲାଗିଥିବା ଜଣାଯାଇଛି। ଏନେଇ ତାଙ୍କୁ ପ୍ରଥମେ ଟିଟିଲାଗଡ ଏବଂ ସେଠାରୁ ବଲାଙ୍ଗିର ଭୀମ ଭୋଇ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିଲା। ତାଙ୍କ ଅବସ୍ଥା ଅଧିକ ଗୁରୁତର ହେବାରୁ ସେଠାରେ ଡାକ୍ତର କଟକ ଡାକ୍ତରଖାନାକୁ ରେଫର କରିଥିଲେ। ପରିବାରବର୍ଗ ଗୁରୁବାର ତାଙ୍କୁ ବିଶାଖାପାଟଣା ନେଇ ଯାଉଥିବା ଜଣାଯାଇଛି। ଏନେଇ ପରିବାର ଲୋକେ ପୁଲିସର ଦ୍ୱାରସ୍ଥ ହୋଇଥିବା ବେଳେ କେବଲ ଜଣେ ବ୍ୟକ୍ତିଙ୍କୁ ପୁଲିସ ଅଟକ ରଖିଥିବା ଅଭିଯୋଗ ହୋଇଛି। ପୁଲିସ ପରିବାର ଲୋକଙ୍କୁ ଏଫଆଇଆର କପି ମଧ୍ୟ ଦେଇନଥିବା ଅଭିଯୋଗ ହୋଇଛି। ଦୋଷୀ ଆକ୍ରମଣକାରୀଙ୍କ ବିରୁଦ୍ଧରେ ପୁଲିସ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ ସହ ନ୍ୟାୟ ପ୍ରଦାନ କରିବାକୁ ପରିବାରବର୍ଗଙ୍କ ପକ୍ଷରୁ ଦାବି ହୋଇଛି।
