ଗୋପାଳପୁର: ବ୍ରହ୍ମପୁର ବିଶ୍ଵବିଦ୍ୟାଳୟରେ ଆଜି ଅନୁଷ୍ଠିତ ହୋଇଥିବା ଏକକ ପ୍ରବେଶିକା ପରୀକ୍ଷାର ୫ମ ଦିନରେ ଜନୈକ ପରୀକ୍ଷାର୍ଥୀ ପରୀକ୍ଷା ହଲ ପରିସରକୁ ମୋବାଇଲ ନେବା ସହ ମୋବାଇଲରେ ପ୍ରଶ୍ନପତ୍ରର ଫଟୋ ଉଠାଇବା ନେଇ ବିଶ୍ବବିଦ୍ୟାଳୟ ପକ୍ଷରୁ ପିଜି କାଉନସିଲ ଅଧ୍ୟକ୍ଷଙ୍କ ପକ୍ଷରୁ ଗୋପାଳପୁର ଥାନାରେ ଲିଖିତ ଅଭିଯୋଗ କରାଯାଇଛି। ଆଜି ପିଜି କମନ ପ୍ରବେଶିକା ପରୀକ୍ଷାର ୫ମ ଦିନରେ ଅର୍ଥନୀତି, ଗୃହ ବିଜ୍ଞାନ, ଜିଓଲୋଜି, ଇତିହାସ, ଏମବିଏ ରୁରାଲ ମେନେଜମେଣ୍ଟର ପରୀକ୍ଷା ଅନୁଷ୍ଠିତ ହୋଇଥିଲା।
ପରୀକ୍ଷା ଚାଲିଥିବା ସମୟରେ ଜୈନିକ ପରୀକ୍ଷାର୍ଥୀ ପରୀକ୍ଷା ହଲକୁ ମୋବାଇଲ ନେବା ସହ ମୋବାଇଲରେ ପ୍ରଶ୍ନପତ୍ରର ଫଟୋ ଉଠାଇବା ଜଣାପଡିବା ପରେ ପରୀକ୍ଷା ହଲରେ କାର୍ଯ୍ୟରତ ଥିବା କର୍ମଚାରୀମାନେ ତୁରନ୍ତ ମୋବାଇଲକୁ ଜବତ କରିବା ସହ ବିଦ୍ୟାର୍ଥୀ ଜଣଙ୍କୁ ପରୀକ୍ଷା ହଲରୁ ବାହାର କରିଦେଇଥିଲେ। ଏହି ଘଟଣା ନେଇ ପିଜି କାଉନସିଲ ଅଧ୍ୟକ୍ଷ ପ୍ରଫେସର୍ ପ୍ରତାପ କୁମାର ମହାନ୍ତିଙ୍କ ପକ୍ଷରୁ ଗୋପାଳପୁର ଥାନାରେ ଲିଖିତ ଅଭିଯୋଗ କରାଯାଇଛି। ଅଭିଯୋଗକୁ ଭିତ୍ତି କରି ଥାନାରେ ୧୩୦/୨୧ ସଂଖ୍ୟାରେ ଏକ ମାମଲା ରୁଜୁ କରାଯାଇଥିବା ଥାନାଧିକାରୀ ମାଧବାନନ୍ଦ ନାୟକ ପ୍ରକାଶ କରିଛନ୍ତି।
