ଲଣ୍ଡନ: ଟେଷ୍ଟ କ୍ରିକେଟ ମ୍ୟାଚକୁ ଅଧିକ ଆକର୍ଷଣୀୟ କରିବା ଲାଗି କେତେକ ପ୍ରସ୍ତାବ ଦେଇଛି ଏମସିସି(ମେରିଲବୋନ କ୍ରିକେଟ କ୍ଲବ) ବିଶ୍ବ କ୍ରିକେଟ ସିମିତି। ଟେଷ୍ଟ ମ୍ୟାଚରେ ଫ୍ରି ହିଟ୍ ସମେତ ଶର୍ଟ କ୍ଲକ(ସମୟ ନଷ୍ଟ ରୋକିବା) ସାମିଲ କରିବାକୁ ଏମସିସି ପକ୍ଷରୁ ସୁପାରିସ କରାଯାଇଛି। ଗତ ସପ୍ତାହରେ ଇଂଲଣ୍ଡର ପୂର୍ବତନ ଅଧିନାୟକ ମାଇକ ଗେଟିଂଙ୍କ ଅଧ୍ୟକ୍ଷତାରେ ସମିତିର ଏକ ବୈଠକ ବେଙ୍ଗାଲୁରୁରେ ଅନୁଷ୍ଠିତ ହୋଇଥିଲା। ଟେଷ୍ଟ କ୍ରିକେଟରେ କେତେକ ପରିବର୍ତ୍ତନ ଆଣିବା ଲାଗି ଏଥିରେ ଆଲୋଚନା ହୋଇଥିଲା। ବୈଠକରେ ଭାରତର ପୂର୍ବତନ ଅଧିନାୟକ ସୌରଭ ଗାଙ୍ଗୁଲି ଉପସ୍ଥିତ ଥିଲେ। ଏସବୁ ପ୍ରସ୍ତାବକୁ ଏମସିସି ନିଜ ୱେବସାଇଟରେ ଦର୍ଶାଇଛି।
୫ଦିନ ଧରି ଖେଳାଯାଉଥିବା ଏହି କ୍ରିକେଟ ଫର୍ମାଟରେ ଧିମା ଓଭର ଗତି ଯୋଗୁ ଦର୍ଶକମାନେ ଖେଳ ଦେଖିବାକୁ ପସନ୍ଦ କରୁନାହାନ୍ତି। ତେଣୁ ଶର୍ଟ କ୍ଲକ ବ୍ୟବସ୍ଥା ଆରମ୍ଭ କରିବା ଜରୁରୀ ହୋଇପଡ଼ିଛି ବୋଲି ଏମସିସି କହିଛନ୍ତି। ଯେତେବେଳେ ଇଂଲଣ୍ଡ, ଅଷ୍ଟ୍ରେଲିଆ, ନ୍ୟୁଜିଲାଣ୍ଡ ଏବଂ ଦକ୍ଷିଣ ଆଫ୍ରିକାର ପ୍ରଶଂସକମାନଙ୍କୁ ଟେଷ୍ଟ କ୍ରିକେଟରେ ଦର୍ଶକଙ୍କ ସଂଖ୍ୟା କମ୍ ହେବାର କାରଣ ବିଷୟରେ ପଚରାଗଲା ସେତେବେଳେ ୨୫ ପ୍ରତିଶତ ପ୍ରଶଂସକ ଧିମା ଓଭର ଗତିକୁ ଦାୟୀ କରିଥିଲେ।
ପ୍ରଶଂସକଙ୍କ କହିବା ଅସୁନାରେ, ଏସବୁ ଦେଶରେ ସ୍ପିନରମାନେ ବହୁତ କମ୍ ଓଭର ବୋଲିଂ କରନ୍ତି। ଗୋଟିଏ ଦିନରେ କେତେବେଳେ ସମ୍ପୂର୍ଣ୍ଣ ୯୦ ଓଭର ବୋଲିଂ କରାଯାଇପାରି ନ ଥାଏ। ଏପରି କି ଅତିରିକ୍ତ ୩୦ ମିନିଟ ସମୟ ନିଆଯାଇଥାଏ। ଏମସିସି କହିଛି ଯେ, ଡିଆରଏସ ବି ବିଳମ୍ବର ଅନ୍ୟ ଏକ କାରଣ। ଖେଳର ଗତି ବଢ଼ାଇବା ଲାଗି କିଛି ପଦକ୍ଷେପ ନିଆଯିବା ଉଚିତ ବୋଲି ଏମସିସି ପକ୍ଷରୁ କୁହାଯାଇଛି।
