ଡେସ୍କ: ଭାରତର ସବୁଜ ବିପ୍ଳବର ଜନକ ଭାବରେ ଜଣାଶୁଣା କୃଷି ବୈଜ୍ଞାନିକ ଏମ.ଏସ୍ ସ୍ୱାମୀନାଥନଙ୍କ ଆଜି ଚେନ୍ନାଇରେ ଦେହାନ୍ତ ହୋଇଛି। ମୃତ୍ୟୁ ବେଳକୁ ତାଙ୍କୁ ୯୮ ବର୍ଷ ବୟସ ହୋଇଥିଲା। ସେ ତାଙ୍କ ବାସଭବନରେ ଶେଷ ନିଶ୍ୱାସ ତ୍ୟାଗ କରିଥିବା ସୂଚନା ମିଳିଛି। ଷାଠିଏ ଦଶକରେ ଭାରତକୁ ଦୁର୍ଭିକ୍ଷ ପରି ପରିସ୍ଥିତିରୁ ଉଦ୍ଧାର କରିବା ପାଇଁ ସ୍ୱାମୀନାଥନ ତାଙ୍କ ନୀତି ମାଧ୍ୟମରେ ଏକ ସାମାଜିକ ବିପ୍ଳବ ଆଣିଥିଲେ। ସେ ଏମ୍ଏସ୍ ସ୍ୱାମୀନାଥନ୍ ଗବେଷଣା ପ୍ରତିଷ୍ଠାନ ସ୍ଥାପନ କରିଥିଲେ ଏବଂ ଅଧିକ ଅମଳକ୍ଷମ ଗହମ ମଞ୍ଜି ବିକାଶରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ, ଯାହା ଭାରତରେ ସବୁଜ ବିପ୍ଳବ ସୃଷ୍ଟି କରିଥିଲା। ସେ ୧୯୭୨ରୁ ୧୯୮୦ ମଧ୍ୟରେ ଭାରତୀୟ କୃଷି ଅନୁସନ୍ଧାନ କେନ୍ଦ୍ରର ମହାନିର୍ଦ୍ଦେଶକ ଏବଂ ୧୯୮୨ରୁ ୧୯୮୮ ମଧ୍ୟରେ ଆନ୍ତର୍ଜାତୀୟ ଧାନ ଅନୁସନ୍ଧାନ ପ୍ରତିଷ୍ଠାନର ମହାନିର୍ଦ୍ଦେଶକ ଥିଲେ।
ଶ୍ରୀ ସ୍ୱାମୀନାଥନ୍ ନିଜର ଗବେଷଣା ଓ ଉଦ୍ଭାବନ ପାଇଁ ଅନେକ ପୁରସ୍କାର ସମ୍ମାନରେ ସମ୍ମାନିତ ହୋଇଛନ୍ତି। ସେ ୧୯୮୬ରେ ଆଲବର୍ଟ ଆଇନଷ୍ଟାଇନ୍ ବିଶ୍ୱ ବିଜ୍ଞାନ ପୁରସ୍କାର, ୧୯୮୭ରେ ପ୍ରଥମ ବିଶ୍ୱ ଖାଦ୍ୟ ପୁରସ୍କାର, ୧୯୯୧ରେ ପରିବେଶ ସଫଳତା ପାଇଁ ଟାଇଲର ପୁରସ୍କାର ଏବଂ ୨୦୦୦ରେ ପ୍ଲାନେଟ୍ ଆଣ୍ଡ ହ୍ୟୁମାନୀଟି ପଦକ ସହିତ ଅନେକ ଆନ୍ତର୍ଜାତୀୟ ପୁରସ୍କାର ଏବଂ ସମ୍ମାନ ପାଇଛନ୍ତି। ତାଙ୍କୁ ପଦ୍ମଶ୍ରୀ, ପଦ୍ମଭୂଷଣ ଏବଂ ପଦ୍ମ ବିଭୂଷଣ ମଧ୍ୟ ପ୍ରଦାନ କରାଯାଇଛି।
Comments are closed.