ଆଗ୍ରା: ଉତ୍ତରପ୍ରଦେଶର ଆଗ୍ରା ଜିଲାର ଏକ ହସ୍ପିଟାଲରେ ସୋମବାର ସକାଳେ ଅଗ୍ନିକାଣ୍ଡ ଘଟିଥିବା ସୂଚନା ମିଳିଛି । ଘଟଣାସ୍ଥଳରେ ଦମକଳ ବାହିନୀ ପହଞ୍ଚି ଅକ୍ଳାନ୍ତ ଉଦ୍ୟମ ପରେ ନିଆଁକୁ ଆୟତ୍ତ କରିଛନ୍ତି । ସର୍ଟ ସର୍କିଟ ଯୋଗୁଁ ନିଆଁ ଲାଗିଥିବା ଅନୁମାନ କରାଯାଉଛି ।
ସୂଚନାଯୋଗ୍ୟ, ସକାଳ ପ୍ରାୟ ୯ଟାରେ ଜିଲା ହସ୍ପିଟାଲର ଚକ୍ଷୁ ରୋଗ ବିଭାଗ ନିକଟରେ ଥିବା ଔଷଧ କାଉଣ୍ଟରରେ ନିଆଁ ଲାଗିଥିଲା। ସେଠାରେ ଉପସ୍ଥିତ ଥିବା ରୋଗୀ ଓ ସେମାନଙ୍କ ସମ୍ପର୍କୀୟମାନେ କାଉଣ୍ଟରରୁ ଧୂଆଁ ବାହାରୁ ଥିବା ଦେଖିବାକୁ ପାଇଥିଲେ । ଚାହୁଁଚାହୁଁ ନିଆଁରେ ସମ୍ପୂର୍ଣ୍ଣ ଔଷଧ କାଉଣ୍ଟରଟି ଜଳି ଯାଇଥିଲା। ଖବରପାଇ ତୁରନ୍ତ ଘଟଣାସ୍ଥଳରେ ଦମକଳ କର୍ମଚାରୀ ପହଞ୍ଚି ନିଆଁ ଲିଭାଇଥିଲେ । ନିଆଁରେ ଅନେକଗୁଡିକ ଔଷଧ ଜଳି ଯାଇଥିବା ଜଣାପଡିଛି । ଏଥିରେ କେହି ମୃତାହତ ହୋଇଛନ୍ତି କି ନାହିଁ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ।
