ଫୁଲବାଣୀ : ଏକ ନାବାଳିକା ଦୁଷ୍କର୍ମ ମାମଲାର ବିଚାର ପୋଷ୍ଟକୋର୍ଟ ବିଚାରପତି ମନୋରଂଜନ ଦାସଙ୍କ ଇଜିଲାସନରେ ଅନୁଷ୍ଠିତ ହୋଇଥିବା ବେଳେ ୧୫ ଜଣ ସାକ୍ଷ୍ୟ ପ୍ରମାଣ, ମେଡ଼ିକାଲ୍ ରିପୋର୍ଟ ଏବଂ ପୀଡିତାଙ୍କ ବୟାନଙ୍କୁ ଭିତିକରି ଅଭିଯୁକ୍ତକୁ ୧୦ ବର୍ଷ ଜେଲଦଣ୍ଡ ସହିତ ୫୨ ହଜାର ଟଙ୍କା ଜରିମାନା ଓ ଜରିମାନା ଅନାଦେୟ ଅଧିକା ୮ ମାସ ଜେଲଦଣ୍ଡ ପାଇଁ ନିର୍ଦ୍ଦେଶ ଦେଇଛନ୍ତି। ଅଭିଯୁକ୍ତ ଜଣକ ହେଲେ ଦାରିଙ୍ଗବାଡ଼ି ଥାନା ଅଂଚଳର ଚନ୍ଦନ କାର୍ଜି ଓରଫ୍ ସ୍ମିତ ରଂଜନ କାର୍ଜି ବୋଲି ସୂଚନା ଦିଆଯାଇଛି।
ସୂଚନା ପ୍ରକାରେ, ଦାରିଙ୍ଗବାଡ଼ିିରେ ଚାଲିଥିବା ଶୀତ ମହୋତ୍ସବ ଦେଖିବା ପାଇଁ ଗତ ୧୩.୧.୨୪ ତାରିଖରେ ଜନୈକ ନାବାଳିକା ଘରଠାରୁ ପ୍ରାୟ ଏକ କିଲୋମିଟର ମହୋତ୍ସବ ପଡ଼ିଆକୁ ଆସୁଥିବା ବେଳେ ଅଭିଯୁକ୍ତ ଜଣକ ରାସ୍ତାରେ ଜୋର ଜବରଦସ୍ତ ଅଟଳାଇବା ସହିତ ସହିତ ଦୁଷ୍କର୍ମ କରି ନିକଟସ୍ଥ ଏକ ଶ୍ମଶାନ ନିକଟରେ ଛାଡ଼ି ପଳାଇଥିଲା। କୌଣସି ପ୍ରକାର ନାବାଳିକା ଜଣକ ରାସ୍ତାକଡ଼କୁ ଆସି ଏକ ଗଛମୂଳରେ ବସି କାନ୍ଦୁଥିବା ବେଳେ ମହୋତ୍ସବ ଦେଖି ଫେରୁଥିବା ଜଣେ ସଂପର୍କୀୟ ରାତ୍ର ପ୍ରାୟ ୧୧ଟାରେ ନାବାଳିକାକୁ ଉଦ୍ଧାର କରି ତାଙ୍କ ଘରେ ନେଇ ଛାଡ଼ିଥିଲେ। ପରେ ସେ ଘଟଣା ସଂପର୍କରେ କହିଥିଲେ। ନାବାଳିକା ଜଣକ ୧୭.୧.୨୪ ତାରିଖ ଦିନ ନିଜେ ଦାରିଙ୍ଗବାଡ଼ି ଥାନାରେ ଏକ ଏତଲା ଦେଇଥିଲେ। ଏତଲା ପ୍ରକାରେ ପୁଲିସ୍ କେସ ନଂ ୧୧ା୨୪ରେ ଏକ ମାମଲା ରୁଜୁ କରି ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଥିବା ବେଳେ ଏହି ମାମଲାର ବିଚାର କରି ଉପରୋକ୍ତ ଦଣ୍ଡାଦେଶ ଦିଆଯାଇଛି। ପୀଡିତାଙ୍କୁ ୫ ଲକ୍ଷ ଟଙ୍କା କ୍ଷତିପୁରଣ ଦେବାକୁ ମଧ୍ୟ କୋର୍ଟ ନିର୍ଦ୍ଦେଶ ଦେଇଛନ୍ତି। ସରକାରଙ୍କ ପକ୍ଷରୁ ପୋସ୍କୋ କୋର୍ଟର ସ୍ୱତନ୍ତ୍ର ପି.ପି ଅମୀମ ପ୍ରହରାଜ ମାମଲା ପରିଚାଳନା କରୁଥିଲେ।
