ପିପିଲି : କେନ୍ଦ୍ର ସରକାରଙ୍କ ନୂତନ କୃଷି ଆଇନକୁ ବିରୋଧ କରି ଦିଲ୍ଲୀରେ ଚାଲିଥିବା ଚାଷୀ ଆନ୍ଦୋଳନକୁ ସମର୍ଥନ ଜଣାଇ ସିପିଆଇ(ଏମ୍ଏଲ୍) ଲିବରେସନର ପିପିଲି ବ୍ଲକ କମିଟି ପକ୍ଷରୁ ବୁଧବାର ୧୧ ଦଫା ଦାବି ନେଇ ପିପିଲିରେ ବିକ୍ଷୋଭ ଶୋଭାଯାତ୍ରା କରାଯିବା ସହ ପ୍ରଧାନମନ୍ତ୍ରୀଙ୍କ କୁଶପୁତ୍ତଳିକା ଦାହ କରାଯାଇଛି।
ସିପିଆଇ(ଏମ୍ଏଲ୍)ର ବରିଷ୍ଠ ନେତା ଅଶୋକ ପ୍ରଧାନଙ୍କ ନେତୃତ୍ୱରେ ଦଳୀୟ କର୍ମୀ ଓ ସମର୍ଥକମାନେ ପିପିଲି ପେଟ୍ରୋଲ ଟାଙ୍କି ଛକ ଠାରୁ ଏକ ଶୋଭାଯାତ୍ରାରେ ବାହାରି କେନ୍ଦ୍ର ସରକାରଙ୍କ ନୂତନ କୃଷି ଆଇନ ବିରୁଦ୍ଧରେ ବିଭିନ୍ନ ସ୍ଳୋଗାନ ଦେଇ ଚାନ୍ଦୁଆ ବଜାର, ଥାନାଛକ ଦେଇ ହାଟଛକ ଠାରେ ପହଞ୍ଚିଥିଲେ। ସେଠାରେ ଶ୍ରୀପ୍ରଧାନଙ୍କ ସଭାପତିତ୍ୱରେ ଅନୁଷ୍ଠିତ ପ୍ରତିବାଦ ସଭାରେ ସିପିଆଇ(ଏମ୍ଏଲ୍)ର ବରିଷ୍ଠ ନେତା କିଷାନ ପଟ୍ଟନାୟକ, ସର୍ବେଶ୍ୱର ଭାରତୀ, ସୁନନ୍ଦ ଗଡନାୟକ, ରାଜକିଶୋର ଶତପଥୀ, ରବିନ୍ଦ୍ର ସ୍ୱାଇଁ, ସୁରେନ୍ଦ୍ର ପଣ୍ଡା, ରବିନ୍ଦ୍ର ପ୍ରଧାନ ପ୍ରମୁଖ ଯୋଗଦେଇ କେନ୍ଦ୍ର ସରକାରଙ୍କ ନୂତନ କୃଷି ଆଇନକୁ କଡା ସମାଲୋଚନା କରିବା ସହ ତାହାକୁ ତୁରନ୍ତ ପ୍ରତ୍ୟାହାର କରିବା ପାଇଁ ଦାବି କରିଥିଲେ।
ଘରୋଇ ଧାନମଣ୍ଡି ବ୍ୟବସ୍ଥା ଉଚ୍ଛେଦ କରି ସରକାରଙ୍କ ପକ୍ଷରୁ ଧାନ କିଣାଯିବା, ଚୁକ୍ତି ଭିତ୍ତିକ କୃଷି ଓ ଟୋକନ ବ୍ୟବସ୍ଥା ଉଚ୍ଛେଦ କରିବା,ନିତ୍ୟ ବ୍ୟବହାର୍ଯ୍ୟ ପଦାର୍ଥ ଆଇନ ୨୦୨୦ ରଦ୍ଦ କରିବା, ଭାଗଚାଷୀଙ୍କ ପାଇଁ ଆଇନ ପ୍ରଣୟନ କରାଯିବା ଓ ପ୍ରତି ପଞ୍ଚାୟତରେ ଧାନମଣ୍ଡି ଖୋଲାଯିବା ପାଇଁ ସେମାନେ ଦାବି କରିଥିଲେ। ପରେ ସେଠାରେ ପ୍ରଧାନମନ୍ତ୍ରୀଙ୍କ କୁଶପୁତ୍ତଳିକାକୁ ଦାହ କରାଯାଇଥିଲା। ନୂତନ କୃଷି ଆଇନ ପ୍ରତ୍ୟାହାର ନହେଲେ ଆଗାମୀ ଦିନରେ ଜୋରଦାର ଆନ୍ଦୋଳନ କରାଯିବ ବୋଲି ଶ୍ରୀପ୍ରଧାନ ଚେତାବନୀ ଦେଇଥିଲେ।
