ନିର୍ବାଚନ କମିଶନ୍ ଆସାମ, କେରଳ, ପୁଡ଼ୁଚେରୀ, ତାମିଲ୍ନାଡ଼ୁ ଏବଂ ପଶ୍ଚିମବଙ୍ଗରେ ଆକାଶବାଣୀ ଓ ଦୂରଦର୍ଶନ ମାଧ୍ୟମରେ ଦଳୀୟ ପ୍ରଚାର ପାଇଁ ସମୟ ସୀମାକୁ ବୃଦ୍ଧି କରିଛନ୍ତି। ଏଥିପାଇଁ ମୋଟ୍ ୯୦ ମିନିଟ୍ର ସମୟସୀମା ଧାର୍ଯ୍ୟ କରାଯାଇଛି। ତେବେ ପ୍ରତ୍ୟେକ ଥର ଲାଗି ପ୍ରଚାରର ସମୟସୀମା ୩୦ ମିନିଟରେ ସୀମିତ ରଖାଯାଇଛି। କେବଳ ଜାତୀୟ ତଥା ରାଜ୍ୟ ସ୍ତରରେ ସ୍ୱୀକୃତିପ୍ରାପ୍ତ ରାଜନୈତିକ ଦଳଗୁଡ଼ିକୁ ଏହି ପ୍ରଚାର ପାଇଁ ସୁଯୋଗ ଦିଆଯାଇଛି। ପ୍ରସାର ଭାରତୀ କର୍ତ୍ତୃପକ୍ଷଙ୍କ ସହ ଆଲୋଚନା ପରେ ଆୟୋଗଙ୍କ ପକ୍ଷରୁ ଏହି ନିଷ୍ପତ୍ତି ନିଆଯାଇଛି।
କୋଭିଡ୍ ନାଇଣ୍ଟିନ୍ ପରିସ୍ଥିତି ତଥା କୋଭିଡ୍ ନିୟମାବଳୀର ପାଳନ ଯୋଗୁଁ ନିର୍ବାଚନ ପ୍ରଚାରରେ ରହିଥିବା କଟକଣାକୁ ଦୃଷ୍ଟିରେ ରଖି କମିଶନ୍ଙ୍କ ପକ୍ଷରୁ ଏହି ସମୟସୀମାକୁ ବୃଦ୍ଧି କରାଯାଇଛି। ପ୍ରାର୍ଥୀ ତାଲିକା ପ୍ରକାଶ ପାଇବା ପରେ ଏବଂ ମତଦାନର ୪୮ ଘଣ୍ଟା ପୂର୍ବରୁ ଏହି ନିର୍ବାଚନ ପ୍ରଚାରଜନିତ କାର୍ଯ୍ୟକ୍ରମ ଶେଷ କରିବାକୁ କମିଶନ୍ଙ୍କ ପକ୍ଷରୁ ସ୍ପଷ୍ଟ କରାଯାଇଛି। ଆକାଶବାଣୀ ଓ ଦୂରଦର୍ଶନ ମାଧ୍ୟମରେ ଦଳପକ୍ଷରୁ କରାଯିବାକୁ ଥିବା ପ୍ରଚାର ସଂକ୍ରାନ୍ତ ଟ୍ରାନ୍ସସ୍କ୍ରିପ୍ଟକୁ କମିଶନଙ୍କ ନିକଟରେ ଆଗୁଆ ଦାଖଲ କରିବା ଲାଗି ଦଳଗୁଡ଼ିକୁ ନିର୍ଦ୍ଦେଶ ଦିଆଯାଇଛି।
