କୋଲକାତା: ପଶ୍ଚିମବଙ୍ଗର କୋଲକାତା ଏନଆରଏସ ମେଡିକାଲ କଲେଜରେ ଡାକ୍ତରମାନଙ୍କୁ ଆକ୍ରମଣ ଘଟଣାକୁ ଦେଶବ୍ୟାପୀ ବିରୋଧ କରାଯାଇଛି। ଏହାର ପ୍ରତିବାଦରେ ରାଜ୍ୟରେ ଡାକ୍ତରମାନଙ୍କ ଧର୍ମଘଟ ଶୁକ୍ରବାର ୪ର୍ଥ ଦିନରେ ପହଞ୍ଚିଛି। ମେଡିକାଲ ସମ୍ମୁଖରେ ଡାକ୍ତରମାନେ ଧାରଣା ଦେଇଛନ୍ତି। ରାଜ୍ୟରେ ବିଭିନ୍ନ ସରକାରୀ ହସ୍ପିଟାଲରେ ଡାକ୍ତରମାନେ ପ୍ରତିବାଦ ଜଣାଇ ଆନ୍ଦୋଳନ ଚଳାଇଥିବାରୁ ରୋଗୀସେବାକୁ ନେଇ ସଙ୍କଟଜନକ ପରିସ୍ଥିତି ସୃଷ୍ଟି ହୋଇଛି। ସେହିପରି ଦେଶବ୍ୟାପୀ ସରକାରୀ ଏବଂ ଘରୋଇ ହସ୍ପିଟାଲର ଡାକ୍ତରମାନେ ସମର୍ଥନ କରି ଆନ୍ଦୋଳନକୁ ଓହ୍ଲାଇଥିବାରୁ ରୋଗୀସେବା ବାଧାପ୍ରାପ୍ତ ହୋଇଛି।
ଅନ୍ୟପଟେ ଗତ ମଙ୍ଗଳବାରଠାରୁ ବନ୍ଦ ରହିଥିବା ଏନଆରଏସ ମେଡିକାଲ କଲେଜର ଜୁନିୟର ଡାକ୍ତରମାନେ ଶୁକ୍ରବାର ସକାଳେ ରୋଗୀମାନଙ୍କୁ ଜରୁରିକାଳୀନ ୱାର୍ଡକୁ ଯିବାକୁ ଅନୁମତି ଦେଇଥିଲେ। କିନ୍ତୁ ସେମାନେ ରୋଗୀଙ୍କ ଚିକିତ୍ସା କରି ନ ଥିଲେ। ସେହିପରି ରାଜ୍ୟରେ ବିଭିନ୍ନ ସରକାରୀ ହସ୍ପିଟାଲରେ ବର୍ହିବିଭାଗରେ ଚିକିତ୍ସା ସେବା ବନ୍ଦ ରହିଛି। ଅଭିଯୁକ୍ତମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଡାକ୍ତରମାନେ ଅଡ଼ିବସିଛନ୍ତି।
ସୂଚନାଯୋଗ୍ୟ, ଗତ ସୋମବାର ରାତିରେ ଏନଆରଏସ ମେଡିକାଲ କଲେଜରେ ରୋଗୀମୃତ୍ୟୁକୁ କେନ୍ଦ୍ରକରି କେତେଜଣ ଲୋକ ୨ ଜଣ ଡାକ୍ତରଙ୍କୁ ମାଡ଼ ମାରିଥିଲେ। ଏହା ପ୍ରତିବାଦରେ ମଙ୍ଗଳବାରଠାରୁ ଡାକ୍ତରମାନେ ଧର୍ମଘଟ ଜାରି ରଖିଛନ୍ତି। ଏପରି କି ମୁଖ୍ୟମନ୍ତ୍ରୀ ମମତା ବାନାର୍ଜୀ ଡାକ୍ତରମାନଙ୍କୁ ବୁଝାଶୁଝା କରିବା ବଦଳରେ କାର୍ଯ୍ୟରେ ଯୋଗଦେବାକୁ ଧମକ ଦେବାରୁ ପରିସ୍ଥିତି ଆହୁରି ଜଟିଳ ହୋଇଛି। ଡାକ୍ତରମାନଙ୍କୁ ସୁରକ୍ଷା ଏବଂ ମାଡ଼ ମାରିଥିବା ଅଭିଯୁକ୍ତଙ୍କୁ ଗିରଫ ଦାବିରେ ନୂଆଦିଲ୍ଲୀ ଏମ୍ସ ଏବଂ ରାୟପୁର ଏମ୍ସ ସମେତ ବିଭିନ୍ନ ରାଜ୍ୟରେ ସରକାରୀ ଡାକ୍ତରଖାନାର ଡାକ୍ତରମାନେ ଆନ୍ଦୋଳନରେ ସାମିଲ ହୋଇଛି।
