ହାଇଦରାବାଦ : ଆନ୍ଦ୍ରପ୍ରଦେଶର ପୂର୍ବ ଗୋଦାବରୀ ଜିଲ୍ଲା ଦେବୀପଟନମରେ ଗୋଦାବରୀ ନଦୀ ବୋଟ ବୁଡ଼ି ଘଟଣାରେ ମୃତ୍ୟୁ ସଂଖ୍ୟା ୨୮ରେ ପହଞ୍ଚିଛି । ମଙ୍ଗଳବାର ସକାଳସୁଦ୍ଧା ଗୋଦାବରୀ ନଦୀରୁ ୧୩ଜଣଙ୍କ ମୃତ ଦେହ ଉଦ୍ଧାର ହୋଇଥିଲା। ତେବେ ବୁଧବାର ସକାଳ ସୁଦ୍ଧା ମୋଟ୍ ୨୬ଟି ମୃତଦେହ ଉଦ୍ଧାର କରାଯାଇଥିବା ସରକାରୀ ସୂତ୍ରରୁ ଜଣାପଡ଼ିଛି। ଅବଶିଷ୍ଟ ନିଖୋଜ ଲୋକଙ୍କୁ ଖୋଜିବା ପାଇଁ ଉଦ୍ୟମ ଜାରୀ ରହିଛି।
ଗତ ରବିବାର ଦିନ ପୂର୍ବ ଗୋଦାବରୀ ଜିଲ୍ଲାର ଦେବୀପଟ୍ଟନମ୍ ନିକଟରେ ପର୍ଯ୍ୟଟକମାନଙ୍କୁ ନେଇ ଯାଉଥିବା ଏକ ଲଞ୍ଚ୍ କଛପୁରମ୍ ନିକଟରେ ବୁଡ଼ିଯାଇଥିଲା। ତେବେ ଏହି ଦୁର୍ଘଟଣାରେ ୨୭ଜଣ ଲୋକ ପହଁରି ପହଁରି କୂଳକୁ ଫେରିଆସିଥିବା ବେଳେ ଅନ୍ୟମାନଙ୍କୁ ଏନ୍ଡିଆର୍ଏଫ୍, ଏସ୍ଡିଆର୍ଏଫ୍, ଅଗ୍ନିସମ ବାହିନୀ ଏବଂ ଆନ୍ଧ୍ରପ୍ରଦେଶ ବିପର୍ଯ୍ୟୟ ପ୍ରଶମନ ବାହିନୀ ଖୋଜାଖୋଜି କରୁଛି। ନୌବାହିନୀର ଏକ ୟୁଏଚ୍ଥ୍ରୀଏଚ୍ ହେଲିକପ୍ଟରକୁ ଏହି କାର୍ଯ୍ୟରେ ନିୟୋଜିତ କରାଯାଇଛି। ସେହିପରି ଓଏନ୍ଜିସିର ଏକ
ହେଲିକପ୍ଟର ମଧ୍ୟ ଉଦ୍ଧାର କାର୍ଯ୍ୟରେସହାୟତା କରୁଛି।
ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ୱା.ଏସ୍. ଜଗନମୋହନ ରେଡ୍ଡୀ ସୋମବାର ଆକାଶମାର୍ଗରୁ ଦୁର୍ଘଟଣାସ୍ଥଳ ପରିଦର୍ଶନ କରିଛନ୍ତି। ଦୁର୍ଘଟଣାର ଉଚ୍ଚସ୍ତରୀୟ ତଦନ୍ତ ପାଇଁ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ୱାଇ.ଏସ୍. ଜଗନମୋହନ ରେଡ୍ଡି ନିର୍ଦ୍ଦେଶ ଦେଇଛନ୍ତି। ଡଙ୍ଗାବୁଡ଼ି ଘଟଣାର ତଦନ୍ତ ପାଇଁ ଏକ ଉଚ୍ଚସ୍ତରୀୟ କମିଟି ମଧ୍ୟ ଗଠନ କରାଯାଇଛି।
