ସମାଜ ଲାଇଭ ଡ଼େସ୍କ : ୨୦୨୭ ଜନଗଣନା ପାଇଁ ଆଗାମୀ ଜାନୁଆରୀ ୧୫ ସୁଦ୍ଧା ଜନଗଣନା କାର୍ଯ୍ୟକର୍ତ୍ତା ନିଯୁକ୍ତି ସମାପ୍ତ କରିବାକୁ ଭାରତର ରେଜିଷ୍ଟ୍ରାର ଜେନେରାଲ ( ଆରଜିଆଇ ) ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳଗୁଡ଼ିକୁ ନିର୍ଦ୍ଦେଶ ଦେଇଛନ୍ତି ।
ସୂଚନା ଅନୁସାରେ ଜଣେ ଗଣନାକାରୀଙ୍କୁ ୭୦୦-୮୦୦ ଜନସଂଖ୍ୟାର ଦାୟିତ୍ବ ନ୍ୟସ୍ତ କରାଯିବ ଏବଂ ପ୍ରତି ଛଅ ଜଣ ଗଣନାକାରୀଙ୍କ ପାଇଁ ଜଣେ ପର୍ଯ୍ୟବେକ୍ଷକଙ୍କୁ ନିୟୋଜିତ କରାଯିବ । ଏହା ବ୍ୟତୀତ ଯେକୌଣସି ଆକସ୍ମିକ ପରିସ୍ଥିତି ପାଇଁ ୧୦ପ୍ରତିଶତ ସଂରକ୍ଷିତ ଗଣନାକାରୀ ଏବଂ ପର୍ଯ୍ୟବେକ୍ଷକ ରହିବେ । ଆରଜିଆଇ କହିଛି ଯେ, ଜନଗଣନା ନିୟମ (୧୯୯୦) ର ନିୟମ ୩ ଅନୁଯାୟୀ ଶିକ୍ଷକ, କିରାଣୀ କିମ୍ବା ରାଜ୍ୟ ସରକାର ଏବଂ ସ୍ଥାନୀୟ ପ୍ରାଧିକରଣର ଯେକୌଣସି ଅଧିକାରୀଙ୍କୁ ଗଣନାକାରୀ ଭାବରେ ନିଯୁକ୍ତ କରାଯିବ । ଗଣନାକାରୀଙ୍କ ଠାରୁ ଉଚ୍ଚ ପଦର ଅଧିକାରୀ ମାନେ ପର୍ଯ୍ୟବେକ୍ଷକ ଭାବେ ନିଯୁକ୍ତି ହେବେ । ରାଜ୍ୟଗୁଡ଼ିକ ଜନଗଣନା ଅଧିକାରୀମାନଙ୍କୁ ନିଯୁକ୍ତ କରିବେ । ଜିଲ୍ଲାଗୁଡ଼ିକରେ ଜିଲ୍ଲାପାଳ ଓ ଜିଲ୍ଲା ମାଜିଷ୍ଟ୍ରେଟ କିମ୍ବା ଯେକୌଣସି ମନୋନୀତ ଅଧିକାରୀଙ୍କୁ ପ୍ରମୁଖ ଜନଗଣନା ଅଧିକାରୀ ଭାବରେ ନିଯୁକ୍ତ କରାଯିବ । ସେମାନେ ସେମାନଙ୍କ କ୍ଷେତ୍ରରେ ଜନଗଣନା କାର୍ଯ୍ୟର ସମସ୍ତ କାର୍ଯ୍ୟ ନିର୍ବାହ କରିବେ । ସେହିପରି, ଏକ ଡିଭିଜନ ଥିବା ସ୍ଥାନରେ ବିଭାଗୀୟ କମିଶନର ବିଭାଗୀୟ ଜନଗଣନା ଅଧିକାରୀ ଭାବରେ କାର୍ଯ୍ୟ କରିବେ । ନଗର ନିଗମ ବା ପୌରାଞ୍ଚଳ ରେ କମିଶନର ଏବଂ ନାଗରିକ ସଂସ୍ଥାର ପ୍ରଶାସନିକ ମୁଖ୍ୟ ପ୍ରମୁଖ ଜନଗଣନା ଅଧିକାରୀ କିମ୍ବା ଅତିରିକ୍ତ ପ୍ରମୁଖ ଜନଗଣନା ଅଧିକାରୀ କିମ୍ବା ଭରପ୍ରାପ୍ତ ଅଧିକାରୀ ଭାବରେ କାର୍ଯ୍ୟ କରିବେ । ଜନଗଣନା ଏକ ନିର୍ଦ୍ଦିଷ୍ଟ ସମୟ ସୀମା ମଧ୍ୟରେ ସାରା ଦେଶରେ ସାରିବା ପାଇଁ ପ୍ରାୟ ୩୦ ଲକ୍ଷ କ୍ଷେତ୍ର କାର୍ଯ୍ୟକର୍ତ୍ତାଙ୍କୁ ନିୟୋଜିତ କରାଯିବ ବୋଲି ସୂଚନା ମିଳିଛି ।
ୱେବ ପୋର୍ଟାଲ ମାଧ୍ୟମରେ ହେବ କାର୍ଯ୍ୟକଳାପ ତଦାରଖ : ଆରଜିଆଇ ଜନଗଣନା ପରିଚାଳନା ପାଇଁ ସିଏମଏମଏସ (ସେନ୍ସସ ମ୍ୟାନେଜମେଣ୍ଟ ଆଣ୍ଡ ମନିଟରିଂ ସିଷ୍ଟମ) ନାମରେ ଏକ ୱେବ ପୋର୍ଟାଲ ଆରମ୍ଭ କରିଛି । ଯାହା ଦ୍ଵାରା ଗଣନାକାରୀ ଏବଂ ପର୍ଯ୍ୟବେକ୍ଷକଙ୍କ ନିଯୁକ୍ତି, ସେମାନଙ୍କୁ ଗଣନା ପାଇଁ ବ୍ଲକ ଏବଂ ପର୍ଯ୍ୟବେକ୍ଷକ ସର୍କଲ ନ୍ୟସ୍ତ କରିବା ଏବଂ କ୍ଷେତ୍ର କାର୍ଯ୍ୟର ପ୍ରକୃତ ସମୟ ପ୍ରଗତି ପରି ସମସ୍ତ କାର୍ଯ୍ୟକଳାପ ପରିଚାଳନା ଏବଂ ତଦାରଖ କରାଯାଇପାରିବ । ଜନଗଣନା ପାଇଁ ଏହି ସମସ୍ତ ନୂତନ ପଦକ୍ଷେପ ସହିତ, ଜନଗଣନା ଅଧିକାରୀମାନଙ୍କର ନିଯୁକ୍ତି ଆରମ୍ଭ କରିବା ପୂର୍ବରୁ ପୋର୍ଟାଲରେ ଜନଗଣନା କାର୍ଯ୍ୟକର୍ତ୍ତାଙ୍କ ପଞ୍ଜିକରଣ ଭଳି ଅନ୍ୟାନ୍ୟ ସମସ୍ତ ଔପଚାରିକତା ସଠିକ୍ ଏବଂ ସମ୍ପୂର୍ଣ୍ଣ ବିବରଣୀ ସମାପ୍ତ କରାଯିବ ବୋଲି ସୂଚନା ରହିଛି । ଯଦି ପର୍ଯ୍ୟବେକ୍ଷକ କୌଣସି ଗଣନାକାରୀଙ୍କୁ ନିଯୁକ୍ତି ଦିଅନ୍ତି ସେମାନଙ୍କୁ ମଧ୍ୟ ପୂର୍ବରୁ ଚିହ୍ନଟ କରି ସିଏମଏମଏସ ପୋର୍ଟାଲରେ ପଞ୍ଜିକୃତ କରାଯିବ । ରାଜ୍ୟ ସରକାର/କେନ୍ଦ୍ରଶାସିତ ଅଞ୍ଚଳ ପ୍ରଶାସନକୁ ଆଗାମୀ ଜାନୁଆରୀ ୧୫ ସୁଦ୍ଧା ଏହି ପ୍ରକ୍ରିୟା ସାରିବାକୁ ନିର୍ଦ୍ଦେଶ ଦିଅଯାଇଛି ।
