ସମ୍ବଲପୁରରେ ମାତିଛନ୍ତି ଲୁଟେରା, ସିସିଟିଭିରେ କଏଦ ହେଲା ବାଇକ ଚୋରି ଦୃଶ୍ୟ

ସମ୍ବଲପୁର: ସମ୍ବଲପୁର ପୁଲିସ ପକ୍ଷରୁ ଆଗାମୀ ଡିସେମ୍ବର ୩୧ ତାରିଖ ପର୍ଯ୍ୟନ୍ତ ଅପରାଧ ନିୟନ୍ତ୍ରଣ ପାଇଁ ନିଶା ଓ ସଟ୍ଟା ବିରୋଧୀ ଅଭିଯାନ ଚାଲିଥିବା ବେଳେ ବାଇକ ଚୋରମାନେ ବେଶ ମାତି ଯାଇଛନ୍ତି । ବିଗତ ଦିନରେ ୩୦ରୁ ଅଧିକ ଚୋରି ବାଇକ ଉଦ୍ଧାର ସହିତ ୧୦ରୁ ଅଧିକ ଲୁଟେରାଙ୍କୁ ଧରି ପୁଲିସ ସାବାସୀ ନେଉଥିବା ବେଳେ ସାକ୍ଷୀପଡାସ୍ଥିତ ବୃକ୍ସହିଲ ସମ୍ମୁଖରୁ ଲୁଟେରା ଜଣେ ଭିଡିଓ ସାମ୍ବାଦିକଙ୍କ ଗାଡି ଚୋରି କରି ନେଇ ପୁଲିସକୁ ଖୋଲା ଚ୍ୟାଲେଞ୍ଜ ଦେଇଛନ୍ତି । ଲୁଟେରା ଜଣକ ଫୋନରେ କଥା ହୋଇ ସାମ୍ବାଦିକ ବାଦଲ ସେନ୍ଦ୍ରିଆଙ୍କ ଗାଡି ନିକଟକୁ ଆସି ଛିଡା ହେବା ପରେ କୌଶଳ କ୍ରମେ ଏକ ମାଷ୍ଟର ଚାବି ଦ୍ଵାରା ଗାଡ଼ି ଚୋରି କରି ନେଇଥିଲେ। ଏହାର ଦୃଶ୍ୟ ନିକଟରେ ଲାଗିଥିବା ସିସିଟିଭି କ୍ୟାମେରାରେ କଏଦ ହୋଇଛି। ପୁଲିସ ନିୟମିତ କିଛି ନା କିଛି ଆପରାଧିକ ଘଟଣାକୁ ରୋକିବାକୁ ପଦକ୍ଷେପ ନେଉଥିବାବେଳେ ପ୍ରକୃତ କ୍ଷେତ୍ରରେ ତାହା କୌଣସି ବିଶେଷ ପ୍ରଭାବ ପକାଇପାରୁ ନାହିଁ। ବାଇକ ଚୋରି ଘଟଣାର ସିସିଟିଭି ଫୁଟେଜ ଭାଇରାଲ ହୋଇଥିବା ବେଳେ ଏ ନେଇ ଏକ ମାମଲା ଧନୁପାଲି ଥାନାରେ ରୁଜୁ କରାଯାଇ ଚୋରି ବାଇକକୁ ଉଦ୍ଧାର ପାଇଁ ଉଦ୍ୟମ ଆରମ୍ଭ କରାଯାଇଛି ବୋଲି ପୁଲିସ କହିଛି।