କୋଲକାତା ଦୁଷ୍କର୍ମ ଓ ହତ୍ୟା ଘଟଣା – ଡାକ୍ତର ସନ୍ଦୀପ ଘୋଷଙ୍କ ବିରୋଧରେ ଏତଲା ଦାୟର କଲା ସିବିଆଇ

ଡେସ୍କ: ପଶ୍ଚିମବଙ୍ଗରେ ଆର୍ ଜି କର ମେଡିକାଲ କଲେଜ ଓ ହସ୍ପିଟାଲର ପୂର୍ବତନ ଅଧ୍ୟକ୍ଷ ଡାକ୍ତର ସନ୍ଦୀପ ଘୋଷଙ୍କ ବିରୋଧରେ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ଆର୍ଥିକ ଅନିୟମିତତା ମାମଲାରେ ଏତଲା ରୁଜୁ କରିଛି। ଡାକ୍ତର ଘୋଷଙ୍କୁ ବର୍ତ୍ତମାନ କୋଲକାତାରେ ପଚରାଉଚରା କରାଯାଉଛି ଏବଂ ପଲିଗ୍ରାଫ୍ ଟେଷ୍ଟ ଚାଲିଛି। ଡାକ୍ତର ଘୋଷଙ୍କ ସମେତ ୭ ଜଣଙ୍କ ପଲିଗ୍ରାଫ୍ ଟେଷ୍ଟ ପାଇଁ ସିବିଆଇ କୋର୍ଟଙ୍କ ଅନୁମୋଦନ ହାସଲ କରିଛି।

ଅନ୍ୟପକ୍ଷରେ ପଶ୍ଚିମବଙ୍ଗର ବିଭିନ୍ନ ସ୍ଥାନରେ ଆର.ଜି କର ପୀଡ଼ିତାଙ୍କୁ ନ୍ୟାୟ ଦାବିରେ ବିକ୍ଷୋଭ ଜାରି ରହିଛି। ଆଜି ଭାରତୀୟ ଛାତ୍ର ମହାସଂଘ, ଡେମୋକ୍ରାଟିକ୍ ୟୁଥ୍ ଫେଡେରେସନ୍ ଅଫ୍ ଇଣ୍ଡିଆ, ଅଲ୍ ଇଣ୍ଡିଆ ଡେମୋକ୍ରାଟିକ୍ ଓମେନ୍ସ ଆସୋସିଏସନ୍ ଏବଂ ଅଲ୍ ଇଣ୍ଡିଆ ଓକିଲ ସଂଘ ଭଳି ବାମପନ୍ଥୀ ଦଳର ଛାତ୍ର ଓ ଯୁବ ସଂଗଠନମାନେ କୋଲକାତା ପୁଲିସ ମୁଖ୍ୟାଳୟ ପର୍ଯ୍ୟନ୍ତ ଏକ ରାଲିରେ ଅଂଶଗ୍ରହଣ କରିଥିଲେ।

ଆର୍ ଜି କର ମେଡିକାଲ କଲେଜରେ ଅନୁଷ୍ଠାନର କନିଷ୍ଠ ଡାକ୍ତରମାନଙ୍କୁ ନେଇ ଏକ ବୈଠକ ଅନୁଷ୍ଠିତ ହୋଇଥିଲା। ଅଧ୍ୟକ୍ଷ ମାନସ ବନ୍ଦୋପାଧ୍ୟାୟ ଏବଂ ପଶ୍ଚିମବଙ୍ଗ ସରକାରଙ୍କ ଚିକିତ୍ସା ଶିକ୍ଷା ନିର୍ଦ୍ଦେଶକ ଡାକ୍ତର କୌସ୍ତଭ ନାଏକ ଉପସ୍ଥିତ ଥିଲେ ମଧ୍ୟ କୌଣସି ନିଷ୍କର୍ଷରେ ପହଞ୍ଚି ପାରିନଥିଲେ।