ଆଠଗଡ ସହର ରାସ୍ତା ଅବସ୍ଥା ବିପର୍ଯ୍ୟସ୍ତ

ଆଠଗଡ:  ପୁରୁଣା କଟକ-ସମ୍ବଲପୁର ମୁଖ୍ୟ ରାସ୍ତାଟି  ଆଠଗଡ ସହର ମଧ୍ୟ ଦେଇ ଯାଇଛି । ଏହି ରାସ୍ତାଟି ମାଧବପୁର, ଘଣ୍ଟିଖାଲ ଓ ଧବଳେଶ୍ୱର ବାଟ ଦେଇ କଟକ ପର୍ଯ୍ୟନ୍ତ ସଂଯୋଗ କରୁଥିବାରୁ ପ୍ରତ୍ୟହ ଏଥିରେ ଶହ ଶହ ଗାଡିମଟର କଟକ, ମଙ୍ଗୁଳି ଓ ଭୁବନେଶ୍ବର ଯିବାଆସିବା କରିଥାଆନ୍ତି । ଏହାଛଡା ସ୍କୁଲ କଲେଜ ଛାତ୍ରଛାତ୍ରୀ ଓ ଆଠଗଡ ଉପଖଣ୍ଡ ଡାକ୍ତରଖାନାକୁ ରୋଗୀ ଯିବାଆସିବା କରିଥାଆନ୍ତି । ତେବେ ଉକ୍ତ ରାସ୍ତାର ଚାନ୍ଦବାଲି ଛକଠାରୁ କନ୍ତୋଲ ନିକଟବର୍ତ୍ତୀ ସାପୁଆ ନଦୀ ପର୍ଯ୍ୟନ୍ତ ୨ କିମି ମଧ୍ୟରେ ଅନେକ ସ୍ଥାନରେ ଖାଲଖମା ପରିପୂର୍ଣ୍ଣ ହେବା ଦ୍ବାରା ରାସ୍ତାଟି ବିପର୍ଯ୍ୟସ୍ତ ହୋଇପଡିଲାଣି।  ବିଶେଷକରି ଡାକ୍ତରଖାନା ନିକଟରେ ଓ ରାସରସିକପୁର ଛକଠାରୁ ଝରଣ ଛକ ପର୍ଯ୍ୟନ୍ତ ରାସ୍ତାର ଅବସ୍ଥା ଶୋଚନୀୟ ହୋଇପଡଲାଣି । ସହର ମଧ୍ୟସ୍ଥ ଏହି ରାସ୍ତାରେ ସୃଷ୍ଟି ହୋଇଥିବା ବଡ ବଡ ଖାଲରେ ବର୍ଷାଜଳ ଭରି ହୋଇଯାଉଥିବାରୁ ଖାଲର ଗଭୀରତା ଜାଣିନପାରି ବାଇକ୍ ଚାଳକ ଖାଲରେ ପଡି ଦୁର୍ଘଟଣାଗ୍ରସ୍ତ ହେଉଛନ୍ତି। ସେହି ରାସ୍ତାରେ ଏହିପରି ପ୍ରତିଦିନ କିଛି ନା କଛି ଦୁର୍ଘଟଣା ଘଟି ବାଇକ ଆରୋହୀ ଆହତ ହେଉଥିବା ଦେଖାଯାଉଛି ।