ପିପିଲି: ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହାଙ୍କୁ ପିପିଲିର ବିଭିନ୍ନ ସ୍ଥାନରେ ଦଳୀୟ ନେତା,କର୍ମୀ ଓ ସମର୍ଥକ ମାନେ ଭବ୍ୟ ସ୍ୱାଗତ କରିଛନ୍ତି । ବିଜେପି ମହିଳା ମୋର୍ଚ୍ଚାର ରାଷ୍ଟ୍ରୀୟ କାର୍ଯ୍ୟକାରିଣୀ ବୈଠକରେ ଯୋଗଦେବା ଲାଗି ସୋମବାର ପୁରୀ ଯିବା ବେଳେ ଭୁବନେଶ୍ୱର-ପୁରୀ ଜାତୀୟ ରାଜପଥର ବିଭିନ୍ନ ସ୍ଥାନରେ ତାଙ୍କୁ ଫୁଲ ତୋଡା ଦେଇ ଭବ୍ୟ ସ୍ୱାଗତ କରାଯାଇଥିଲା ।
ପିପିଲିର ମଙ୍ଗଳପୁର ବଜାର ଠାରେ ବିଜେପି ନେତା ଆଶ୍ରୀତ ପଟ୍ଟନାୟକଙ୍କ ସମେତ ବରିଷ୍ଠ ନେତା ଡାକ୍ତର ନବକିଶୋର ରାଉତ, ପ୍ରଦୀପ ପାତ୍ର, ଶ୍ୱେତ କୁମାର ନାୟକ, ମିନତୀ ବଳିୟାରସିଂ, ସୁଧାଂଶୁ ପରିଡା, କୃତିବାସ ମହାପାତ୍ର, ଇଶ୍ୱର ପ୍ରସାଦ ଦାଶ, ପ୍ରସନ୍ନ ସ୍ୱାଇଁ, ଭାରତୀ ପରିଡା, ଗୀତାଞ୍ଜଳୀ ମିଶ୍ର ପ୍ରମୁଖ ଶ୍ରୀ ଶାହାଙ୍କ ସମେତ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ପୁଲତୋଡା ଦେଇ ସ୍ୱାଗତ କରିଥିଲେ । କଳଘୋଡା ନୃତ୍ୟ, ଚାନ୍ଦୁଆ ଛତି, ତ୍ରାସର ସାଜସଜ୍ଜା ମଧ୍ୟରେ ଦଳୀୟ କର୍ମୀ ଓ ସମର୍ଥକ ମାନେ ରାସ୍ତା ପାଶ୍ୱର୍ରେ ଧାଡିରେ ଠିଆ ହୋଇ ବିଭିନ୍ନ ସ୍ଲୋଗାନ ଦେଇ ତାଙ୍କୁ ଭବ୍ୟ ସ୍ୱାଗତ କରିଥିଲେ । ସେହିପରି ଉତ୍ତରାବଜାର ଓ ସାତଶଙ୍ଖ ବଜାର ଠାରେ ମଧ୍ୟ ଦଳୀୟ ନେତା, କର୍ମୀ ଓ ସମର୍ଥକ ମାନେ ଶ୍ରୀ ଶାହାଙ୍କୁ ସ୍ୱାଗତ କରିଥିଲେ ।
