ଭୁବନେଶ୍ୱର . – ସୁପ୍ରିମକୋର୍ଟ ସମଲିଙ୍ଗୀ ସମ୍ପର୍କ ସମର୍ଥନରେ ରାୟ ଦେବା ପରେ ଓଡିଶାର ସରକାରୀ ଅଧିକାରୀ କିନ୍ନର ଐଶ୍ୱରୀୟା ଋତୁପର୍ଣ୍ଣା ପ୍ରଧାନ ଔପଚାରିକ ଭାବେ ସମଲିଙ୍ଗୀ ବିବାହ କରିବା ପାଇଁ ଯୋଜନା କରିଛନ୍ତି । ସେ ଓଡିଶା ଅର୍ଥନୈତିକ ସେବାରେ ଜଣେ ଅଧିକାରୀ ଭାବେ କାର୍ଯ୍ୟରତ । ୨୦୧୪ରେ ସୁପ୍ରିମ କୋର୍ଟ କିନ୍ନରଙ୍କୁ ତୃତୀୟ ଲିଙ୍ଗର ମାନ୍ୟତା ଦେଇଥିଲା । ଏହାପରେ ସେ ନିଜର ପରିଚୟ ପୁରୁଷରୁ କିନ୍ନରକୁ କରିଥିଲେ । ସେ ଗତ ଅଢେଇ ବର୍ଷ ଧରି ରହୁଥିବା ବ୍ୟକ୍ତିଙ୍କ ସହ ବିବାହ କରିବାକୁ ମନସ୍ଥ କରିଥିବା କହିଛନ୍ତି । ଆଇନତଃ ଜଣେ ଶିଶୁ ଆପଣେଇବେ ବୋଲି ସୂଚନା ଦେଇଛନ୍ତି ।
ବହୁ ଘାତ ପ୍ରତିଘାତ ସତ୍ତ୍ୱେ ଐଶ୍ୱରୀୟା ଋତୁପର୍ଣ୍ଣା ନିଜର ପାଠ ପଢା ଜାରି ରଖିଥିଲେ ଏବଂ ଜଣେ ସଫଳ ସରକାରୀ ଅଧିକାରୀ ହୋଇ ପାରିଛନ୍ତି ବୋଲି କହିଛନ୍ତି ।
୨୦୧୦ରେ ସେ ଓଡିଶା ପ୍ରଶାସନିକ ସେବାର ପରୀକ୍ଷାରେ କୃତକାର୍ଯ୍ୟ ହେବାପରେ ଅର୍ଥନୈତିକ ସେବାରେ ଯୋଗ ଦେଇଥିଲେ । ୨୦୧୬ରେ ସେ ନିଜ ଜୀବନ ସାଥିଙ୍କୁ ପାଇଥିବା କଥା କହିଛନ୍ତି । ସୁପ୍ରିମକୋର୍ଟଙ୍କ ଐତିହାସିକ ରାୟ ପରେ ସେ ଔପଚାରିକ ଭାବେ ବିବାହବନ୍ଧନରେ ଆବଦ୍ଧ ହେବେ ବୋଲି କହିଛନ୍ତି । ଆସନ୍ତା ବର୍ଷ ସେ ବିବାହ କରିବେ ବୋଲି ବିଭିନ୍ନ ଗଣ ମାଧ୍ୟମକୁ ସୂଚନା ଦେଇଛନ୍ତି ।
