ନୂଆଦିଲ୍ଲୀ: ଘର ଭିତର ହେଉ ଅବା ବାହାର ହେଉ, ବାୟୁ ପ୍ରଦୂଷଣ ଏକ ନିରବ ଓ ଅଦୃଶ୍ୟ ଅସ୍ତ୍ର ସାଜିଛି । ଏହା ପ୍ରତ୍ୟେକ ବର୍ଷ ୭୦ ଲକ୍ଷ ଲୋକଙ୍କ ଅକାଳ ମୃତ୍ୟୁର କାରଣ ପାଲଟିଛି । ଏଥିରେ ପ୍ରତି ବର୍ଷ ପ୍ରାୟ ୬ ଲକ୍ଷ ଶିଶୁ ପ୍ରାଣ ହରାଉଛନ୍ତି । ପରିବେଶ ଓ ମାନବାଧିକାର ପାଇଁ କାର୍ଯ୍ୟ କରୁଥିବା ମିଳିତ ଜାତିସଂଘର ସ୍ବତନ୍ତ୍ର ଦୂତ ଡେଭିଡ୍ ଆର.ବୟଡଙ୍କ ସୂଚନା ଅନୁଯାୟୀ, ଛଅ ଅରବ ବା ଛଅ ଶହ କୋଟିରୁ ଅଧିକ ଲୋକ ପ୍ରଦୂଷିତ ବାୟୁରେ ପ୍ରଶ୍ବାସ ନେଉଛନ୍ତି । ସେମାନେ ବିପଦଜନକ ଅବସ୍ଥାରେ ଜୀବନ ନିର୍ବାହ କରୁଛନ୍ତି । ସେମାନଙ୍କ ମଧ୍ୟରେ ଏକ-ତୃତୀୟାଂଶ ଶିଶୁ ରହିଛନ୍ତି ।
ମାନବାଧିକାର ପରିଷଦରେ ବୟଡ କହିଛନ୍ତି ଯେ, କିଛି ବର୍ଷ ପ୍ରଦୂଷିତ ବାୟୁରେ ପ୍ରଶ୍ବାସ ନେବା ଦ୍ବାରା କ୍ୟାନସର, ଶ୍ବାସକ୍ରିୟା ଜନିତ ରୋଗ ଏବଂ ହୃଦଘାତ ଜନିତ ରୋଗରେ ଆକ୍ରାନ୍ତ ହୋଇ ପ୍ରତି ଘଣ୍ଟାରେ ୮ ଶହ ଲୋକ ପ୍ରାଣ ହରାଉଛନ୍ତି ।
ଏଭଳି କିଛି ପରମ୍ପରାର ଉଦାହରଣ ଦେଇ ବୟଡ କହିଛନ୍ତି ବାୟୁ ପ୍ରଦୂଷଣ ଏଭଳି ଏକ ସମସ୍ୟା ଯାହାକୁ ରୋକା ଯାଇ ପାରିବ । ଭାରତ ଓ ଇଣ୍ଡୋନେସିଆରେ ଚାଲୁଥିବା କାର୍ଯ୍ୟକ୍ରମ ମାଧ୍ୟମରେ ଗରିବ ପରିବାର ଲୋକଙ୍କ ରୋଷେଇ ଶୈଳୀରେ ପରିବର୍ତ୍ତନ ଆସିଛି । ଚୁଲା ଓ କୋଇଲା ବ୍ୟବହାର ଛାଡି ଖାଦ୍ୟ ପ୍ରସ୍ତୁତ ପାଇଁ ସ୍ବଚ୍ଛ ପ୍ରଯୁକ୍ତି ବିଦ୍ୟାକୁ ଆପଣାଇଛନ୍ତି । ଯାହା ଫଳରେ ରୋଷେଇ କାର୍ଯ୍ୟରୁ କୋଇଲାର ବ୍ୟବହାରକୁ ସମ୍ପୂର୍ଣ୍ଣ ଭାବେ ହଟାଇ ଦିଆଯାଇ ପାରିଛି ।
