ରାଞ୍ଚି : ଝାଡ଼ଖଣ୍ଡର ରାଞ୍ଚି ସ୍ଥିତ ବିର୍ଶାମୁଣ୍ଡା ବିମାନ ବନ୍ଦରଠାରେ ଏୟାର୍ ଏସିଆର ଏକ ବିମାନ ଅବତରଣ କରିବା ସହ ଆଉ ଏକ ବଡ଼ ବିମାନ ଦୁର୍ଘଟଣାକୁ ଏଡ଼ାଇ ଦିଆଯାଇପାରିଛି। ବିମାନଟି ଉଡ଼ାଣ ଆରମ୍ଭ କରିବା ସମୟରେ ଏହାର ଇଞ୍ଜିନରେ ଏକ ପକ୍ଷୀ ମାଡ଼ ହୋଇଯିବାରୁ ଇଞ୍ଜିନରେ ଅଗ୍ନିକଣା ଦେଖାଯାଇଥିଲା। ଏହାପରେ ବିମାନଟିକୁ ଅବତରଣ କରାଯାଇ ଏହାର ଯାଞ୍ଚ କରାଯାଇଥିଲା ଓ ଏକ ବଡ଼ ଦୁର୍ଘଟଣାକୁ ଏଡ଼ାଯାଇପାରିଥିଲା।
ବିମାନ ବନ୍ଦର ନିର୍ଦ୍ଦେଶକ ବିନୋଦ ଶର୍ମା କହିଛନ୍ତି, ବିମାନଟିର ଭଲଭାବେ ପରୀକ୍ଷା ନିରୀକ୍ଷା କରାଯିବା ପରେ ଏହା ଉଡ଼ାଣ କରିଛି। ବିମାନର ସମସ୍ତ ୧୭୬ ଜଣ ଯାତ୍ରୀ ନିରାପଦ ଅଛନ୍ତି ଓ ସେମାନଙ୍କୁ ବିମାନ ବନ୍ଦରରେ ରଖାଯାଇ ଥିଲା। ଶ୍ରୀ ଶର୍ମା କହିଛନ୍ତି, ଏକ ପକ୍ଷୀ ବିମାନର ଇଞ୍ଜିନ୍ ଦେହରେ ମାଡ଼ ହୋଇଯାଇଥିଲା। ଗତ ପାଞ୍ଚ ମାସ ଭିତରେ ଏହା ହେଉଛି ଏ ଧରଣର ପ୍ରଥମ ଘଟଣା।
