ନୂଆଦିଲ୍ଲୀ: କରୋନା ଟିକାକରଣ ପାଇଁ ନାମ ପଞ୍ଜୀକରଣ କରାଯାଉଥିବା ପୋର୍ଟାଲ ‘କୋୱିନ୍’ରେ ୪ସଂଖ୍ୟା ବିଶିଷ୍ଟ ସୁରକ୍ଷା ଚାବି (ସିକ୍ୟୁରିଟି କୋଡ୍) ବ୍ୟବସ୍ଥା କରାଯାଇଛି। ଏହା ଆଜି ଠାରୁ କାର୍ଯ୍ୟକାରୀ ହେବ। ଏହାଦ୍ବାରା ନାମ ପଞ୍ଜୀକରଣ ଓ ଟିକାରକଣର ସ୍ଥିତି ସମ୍ପର୍କିତ ତ୍ରୁଟି ସୁଧାରି ହେବ ବୋଲି ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ କୁହାଯାଇଛି। ଟିକାରକଣ ପାଇଁ ନାମ ପଞ୍ଜୀକରଣ କରୁଥିବା ହିତାଧିକାରୀ ବାସ୍ତବରେ ଟିକା ନେଇ ନ ଥିଲେ ମଧ୍ୟ ତାଙ୍କ ନିକଟରେ ଟିକା ନେଇଥିବାର ସୂଚନା ପହଞ୍ଚୁଥିବା ଦେଖାଯାଉଛି। ଏଭଳି ଭୁଲ୍ ସୁଧାରିବା ପାଇଁ କର୍ତ୍ତୃପକ୍ଷ ନୂଆ ପଦକ୍ଷେପ ନେଇଛନ୍ତି।
ଅନ୍ଲାଇନ୍ରେ ପଞ୍ଜୀକରଣ ପରେ ଏଣିକି ଏକ ୪ ସଂଖ୍ୟା ବିଶିଷ୍ଟ ସୁରକ୍ଷା ଚାବି ହିତାଧିକାରୀଙ୍କ ପାଇଁ ଉପଲବ୍ଧ ହେବ। ଏହା ହିତାଧିକାରୀଙ୍କ ପାଇଁ ଉଦ୍ଦିଷ୍ଟ ଟିକାକରଣ ସୂଚନା ବାର୍ତ୍ତାରେ ଉଲ୍ଲେଖ ରହିବ, ଟିକାକରଣ କର୍ମଚାରୀ ଏହା ଜାଣିବେ ନାହିଁ। ଟିକାକରଣ ପୂର୍ବରୁ ଟିକା ଦେଉଥିବା ଅଧିକାରୀ ଏହି ୪ ସଂଖ୍ୟା ବିଶିଷ୍ଟ ଚାବି ବା କୋଡ୍ ସମ୍ପର୍କରେ ଅବଗତ ହେବେ ଏବଂ ଏହାକୁ ‘କୋୱିନ୍’ ଲିପିବଦ୍ଧ କରିବେ। ଏହାଦ୍ବାରା ଟିକାକରଣ ଜନିତ ଭୁଲ୍ ଭଟକା ରହିବ ନାହିଁ। ଏହାଦ୍ବାରା ଟିକାକରଣ ହୋଇଥିବା ନିଧାର୍ଯ୍ୟ ହେବ। ଏହି ବ୍ୟବସ୍ଥା କେବଳ ଅନ୍ ଲାଇନ୍ ପଞ୍ଜୀକରଣ କ୍ଷେତ୍ରରେ ପ୍ରଯୁଜ୍ୟ ବୋଲି ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ସ୍ପଷ୍ଟ କରାଯାଇଛି।
