ଶ୍ରୀନଗର: ଜାମ୍ମୁ-କାଶ୍ମୀରରେ ଧାରା ୩୭୦ ଉଚ୍ଛେଦ ହେବା ପରେ ସୁରକ୍ଷା ଦୃଷ୍ଟିରୁ ବନ୍ଦ କରିଦିଆଯାଇଥିବା ୧୯୦ ପ୍ରାଥମିକ ସ୍କୁଲ ସୋମବାର ପୁଣି ଥରେ ଖୋଲିଛି। ୧୨ ଦିନ ପରେ ସ୍କୁଲଗୁଡ଼ିକ ଖୋଲିଥିବାରୁ ଛାତ୍ରଛାତ୍ରୀମାନଙ୍କ ମଧ୍ୟରେ ବେଶ୍ ଉତ୍ସାହ ଦେଖିବାକୁ ମିଳିଛି। ପିଲାମାନେ ସକାଳୁ ସକାଳୁ ସ୍କୁଲ ଯାଇଥିବାବେଳେ ପରିସ୍ଥିତି ସ୍ବାଭାବିକ ରହିଥିବା ଦେଖାଯାଇଛି। ଆଗକୁ ସରକାରଙ୍କ ପକ୍ଷରୁ ଆହୁରି କଟକଣା କୋହଳ କରାଯିବାର ସମ୍ଭାବନା ରହିଛି। ସରକାରଙ୍କ ପ୍ରମୁଖ ସଚିବ ରୋହିତ କଂସଲ ସାମ୍ବାଦିକମାନଙ୍କୁ କହିଛନ୍ତି, ରବିବାର ୫୦ ଥାନା ଅଞ୍ଚଳରେ କଟକଣା କୋହଳ କରାଯାଇଛି। କଟକଣା ଅବଧି ୬ଘଣ୍ଟାରୁ ୮ ଘଣ୍ଟାକୁ ବୃଦ୍ଧି କରାଯାଇଛି।
ଅନ୍ୟପଟେ ଜାମ୍ମୁର ୫ଟି ଜିଲା ସାମ୍ବା, କଠୁଆ, ଜାମ୍ମୁ, ରିୟାସୀ ଏବଂ ଉଦ୍ଧମପୁରରେ ରବିବାର ପୁଣି ଥରେ ମୋବାଇଲ ଏବଂ ଇଣ୍ଟରନେଟ ସେବା ବନ୍ଦ କରିଦିଆଯାଇଛି। ଶୁକ୍ରବାର ରାତିରୁ ଏହିସବୁ ଜିଲାରେ ଇଣ୍ଟରନେଟ ସେବା ଆରମ୍ଭ କରାଯାଇଥିଲା। କିନ୍ତୁ ଶନିବାର କେତେକ ଅଞ୍ଚଳରେ ହିଂସା ସୃଷ୍ଟି ହେବାରୁ ପ୍ରଶାସନ ଏଭଳି ପଦକ୍ଷେପ ନେଇଥିଲା। ସ୍ଥାନେ ସ୍ଥାନେ ପ୍ରଶାସନ ପକ୍ଷରୁ ଅତିରିକ୍ତ ସତର୍କତା ମୂଳକ ପଦକ୍ଷେପ ଗ୍ରହଣ କରାଯାଇଛି।
