ନୂଆଦିଲ୍ଲୀ: ପୂର୍ବତନ ଅର୍ଥମନ୍ତ୍ରୀ ତଥା ବିଜେପିର ବରିଷ୍ଠ ନେତା ଅରୁଣ ଜେଟ୍ଲୀଙ୍କ ସ୍ବାସ୍ଥ୍ୟାବସ୍ଥା ଅଧିକ ଗମ୍ଭୀର ହେବାରେ ଲାଗିଛି। ଗତ ୯ ତାରିଖରୁ ତାଙ୍କୁ ନୂଆଦିଲ୍ଲୀ ଏମ୍ସରେ ଭେଣ୍ଟିଲେଟରେ ରଖି ଚିକିତ୍ସା କରାଯାଉଥିଲା। କିନ୍ତୁ ଶନିବାର ତାଙ୍କ ସ୍ବାସ୍ଥ୍ୟାବସ୍ଥା ଅଧିକ ସଙ୍କଟାପନ୍ନ ହୋଇପଡ଼ିଛି। ଫଳରେ ତାଙ୍କୁ ଭେଣ୍ଟିଲେଟରରୁ ବାହାର କରି ଇସିଏମଓ(ଏକ୍ସଟ୍ରା କର୍ପୋରିୟଲ ମେମ୍ବ୍ରନ ଅକ୍ସିଜେନେଶନ)ରେ ରଖି ଚିକିତ୍ସା କରାଯାଉଛି। ଜେଟ୍ଲୀଙ୍କ ଶରୀରରେ ସଂକ୍ରମଣ ବ୍ୟାପିଯାଇଥିବା ଜଣାପଡ଼ିଛି। ସୂଚନାଯୋଗ୍ୟ, ଜଣେ ରୋଗୀଙ୍କୁ ସେତେବେଳେ ଇସିଏମଓରେ ରଖି ଚିକିତ୍ସା କରାଯାଏ, ଯେତେବେଳେ ତାଙ୍କର ହାର୍ଟ, ଫୁସଫୁସ୍ ଠିକ୍ ଭାବେ କାମ କରି ନ ଥାଏ ଏବଂ ଭେଣ୍ଟିଲେଟରରେ ରଖିଲେ କୌଣସି ଫାଇଦା ମିଳି ନ ଥାଏ। ଇସିଏମଓ ଜରିଆରେ ଶରୀରକୁ ଅମ୍ଳଜାନ ଯୋଗାଯାଇଥାଏ।
ଅନ୍ୟପଟେ ଶନିବାର କେନ୍ଦ୍ର ମନ୍ତ୍ରୀ ଜିତେନ୍ଦ୍ର ସିଂହ ଏମ୍ସରେ ପହଞ୍ଚି ଜେଟ୍ଲୀଙ୍କ ସ୍ବାସ୍ଥ୍ୟାବସ୍ଥା ପଚାରି ବୁଝିଛନ୍ତି। ସେହିପରି ସ୍ବରାଷ୍ଟ୍ରମନ୍ତ୍ରୀ ଅମିତ ଶାହ ମଧ୍ୟ ଶନିବାର ୨ୟ ଥର ପାଇଁ ଏମ୍ସ ଯାଇଛନ୍ତି। ଏହାସହିତ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଡା. ହର୍ଷବର୍ଦ୍ଧନ ଏବଂ ବିଏସପି ମୁଖ୍ୟ ମାୟାବତୀ, କଂଗ୍ରେସ ନେତା ଅଭିଷେକ ମନୁ ସିଙ୍ଘୱୀ ମଧ୍ୟ ହସ୍ପିଟାଲରେ ପହଞ୍ଚିଛନ୍ତି।
