ଜମ୍ମୁ: ଟେରର ଫଣ୍ଡିଂ ମାମଲାରେ ଜମ୍ମୁ-କାଶ୍ମୀରରେ ଏନଆଇଏର ଚଢଉ ଜାରି ରହିଛି । ରବିବାର ସକାଳେ ଉତ୍ତର କାଶ୍ମୀରର ବାରମୁଲା ଜିଲାରେ ଥିବା ଚାରୋଟି ସ୍ଥାନରେ ଏନଆଇଏ ଚଢାଉ କରିଛି । ସୂଚନାଯୋଗ୍ୟ, ଶୁକ୍ରବାର ଦିନ ଶ୍ରୀନଗର ଏବଂ ବଡଗାମ ଜିଲ୍ଲାରେ ଏନଆଇଏ ପକ୍ଷରୁ ଚଢଉ ହୋଇଥିଲା । ଶ୍ରୀନଗରର ରାଜବାଗ ଅଞ୍ଚଳରେ ମଜୀଦ ମଲ୍ଲା ଓ ବଡଗାମ ଜିଲାର ଅହମ୍ମଦ ଶେଖ, ବଶୀର ଅହମ୍ମଦ ଶେଖ, ମହମ୍ମଦ ଅଫଜଲ ମୀରଙ୍କ ଘରେ ଏନଆଇଏ ଚଢଉ କରିଥିଲା ।
ସେହିପରି ମଙ୍ଗଳବାର ଦିନ କ୍ରସ ଏଲଓସି ଟ୍ରେଡ ମାମଲାରେ ଶ୍ରୀନଗର ଓ ପୁଲୱାମାର ୬ଟି ସ୍ଥାନରେ ଏନଆଇଏ ଦ୍ବାରା ଚଢଉ ହୋଇଥିଲା । ଚଢଉ ବେଳେ ଗୁରୁତ୍ବପୂର୍ଣ୍ଣ କାଗଜପତ୍ର ସହ ବୈଦ୍ୟୁତିକ ଯନ୍ତ୍ରପାତି ଜବତ ହୋଇଥିଲା । ଯେଉଁମାନଙ୍କ ଘରେ ଚଢାଉ ହୋଇଛି ସେମାନେ ସ୍ଥାନୀୟ ଯୁବକଙ୍କୁ ଲଶ୍କର-ଏ-ତୋଏବାରେ ସାମିଲ ହେବା ପାଇଁ ଏବଂ ସେମାନଙ୍କ ଗତିବିଧିକୁ ଆପଣାଇବା ପାଇଁ ଉସୁକାଇଥିଲେ । ବିଛିନ୍ନତାବାଦୀଙ୍କ ଇସାରାରେ ଏହି ଯୁବକଙ୍କର ଜାଲ କାଗଜପତ୍ର ତିଆରି କରାଯାଇ ସେମାନଙ୍କୁ ପାକିସ୍ତାନ ପଠାଯାଉଥିଲା । ସେଠାରେ ସେମାନଙ୍କୁ ଆତଙ୍କବାଦୀ ପ୍ରଶିକ୍ଷଣ ଦିଆଯାଉଥିଲା।
