ଚେନ୍ନାଇ: ଗୋମାଂସ ସୁପ୍ ପିଇବା ଏବଂ ଏହାର ଫଟୋ ସୋସିଆଲ ମିଡିଆରେ ଭାଇରାଲ କରିବାରୁ ଜଣେ ଯୁବକଙ୍କୁ ମାଡ଼ ମରାଯିବା ସହିତ ଛୁରିରେ ଆକ୍ରମଣ କରାଯାଇଛି। ଗୁରୁତର ଅବସ୍ଥାରେ ଉକ୍ତ ଯୁବକଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ତାମିଲନାଡୁର ନାଗାପଟ୍ଟିନମ ଜିଲାରେ ଏହି ଘଟଣା ଘଟିଛି।
ନାଗାପଟ୍ଟିନମର ବୋରାବଚେରି ଗ୍ରାମର ଜଣେ ବାସିନ୍ଦା ହେଉଛନ୍ତି ମହମ୍ମଦ ଫୈଜନ। ସେ ଗତ ଜୁଲାଇ ୯ରେ ଫେସବୁକରେ ଏକ ଫଟୋ ଅପ୍ଲୋଡ୍ କରିଥିଲେ। ସେଥିରେ ସେ ଗୋମାଂସ ସୁପ ପିଉଥିବା ଦେଖିବାକୁ ମିଳିଥିଲା। ଏହା ପରେ ହିନ୍ଦୁ ମକ୍କଲ କାଚି ଗୋଷ୍ଠୀର କେତେଜଣ ସଦସ୍ୟ ଫୈଜନଙ୍କ ଘରକୁ ଯାଇ ତାଙ୍କୁ ନିସ୍ତୁକ ମାଡ଼ ମାରିଥିଲେ। ଏପରି କି ଛୁରିରେ ମଧ୍ୟ ଆକ୍ରମଣ କରିଥିଲେ। ଫୈଜନଙ୍କ ପରିବାର ଲୋକେ ଥାନାରେ ଅଭିଯୋଗ କରିବା ସହିତ ଆକ୍ରମଣକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି। ଏହି ଘଟଣାରେ ପୁଲିସ ଦିନେଶ କୁମାର, ଗଣେଶ କୁମାର, ମୋହନ କୁମାର ନାମକ ଯୁବକଙ୍କୁ ଗିରଫ କରିବା ସହିତ ହତ୍ୟା ଉଦ୍ୟମ ମାମଲା ରୁଜୁ କରିଛି।
