ଆରଡି : ଗରିବ ଓ ଅସହାୟ ଲୋକମାନଙ୍କ ପାଇଁ ସରକାର ନାନାବିଧ ଯୋଜନା ପ୍ରଣୟନ କରିଛନ୍ତି। ହେଲେ ତାହା ଆଜି ପ୍ରର୍ଯ୍ୟନ୍ତ ଠିକ ଭାବେ ପହଁଚି ପାରିନାହିଁ ସେହି ଅସହାୟ ଲୋକମାନଙ୍କ ନିକଟରେ। କିଏ ଦାରିଦ୍ର୍ୟ ସୀମାରେଖା ତଳେ ବର୍ଷବର୍ଷ ଧରି ପଡି ରହିଛି ତ, ଆଉକିଏ ପରଘରେ ପାଇଟି କରି ନିଜର ପରିବାର ପୋଷଣ କରୁଛି । ଏପରି ବାସ୍ତବ ଚିତ୍ର ଦେଖିବାକୁ ମିଳିଛି ଭଦ୍ରକ ଜିଲା ଚାନ୍ଦବାଲି ବ୍ଲକ ମୁଆଁ ଗାଁର ଜଟାଳି ଦାସଙ୍କ ନିକଟରେ । ଜଟାଳି ଦୀର୍ଘବର୍ଷ ହେବ ଦାରିଦ୍ର୍ୟ ସୀମାରେଖା ତଳେ ବସବାସ କରିବା ସହ ପରଘରେ ମୂଲ ଲାଗି ନିଜର ପରିବାର ପୋଷଣ କରନ୍ତି। ହେଲେ ଏବେ ଜଟାଳିଙ୍କ ସମସ୍ୟ ବଢିଯାଇଛି, ଦୀର୍ଘ କିଛିମାସ ହେବ ଜଟାଳି କର୍କଟ ରୋଗରେ ପୀଡିତ ଥିବାରୁ ଆଉ ନିଜ ପରିବାର ଚଳାଇବା ତ ଦୂରର କଥା ନିଜେ ଠିକ ଭାବେ ଉଠି ବସି ପାରୁନାହାନ୍ତି । ରୋଗ ଭଲ କରିବା ପାଇଁ ନିଜ ପାଖରେ ଯାହାକିଛି ଅର୍ଥ ଥିଲା ସେତକ ପରିକ୍ଷା ନୀରିକ୍ଷାରେ ସରିଯାଇଥିବା ତାଙ୍କ ପଡୋଶୀ ରତ୍ନାକର ଦାସ ପ୍ରକାଶ କରିଛନ୍ତି । ଅନ୍ୟପଟେ ଜଟାଳିଙ୍କୁ ବିଭିନ୍ନ ଯୋଜାନରେ ସ୍ୱାସ୍ଥ୍ୟ କଲ୍ୟାଣ କାର୍ଡ ମିଳିଥିଲେ ମଧ୍ୟ ତାହା କାମ କରୁନଥିବା ଜଣାପଡିଛି। ଜଟାଳିର କର୍କଟ ଚିକିତ୍ସା ପାଇଁ ପରିବାର ଲୋକ ଗାଁ ଗାଁ ବୁଲି କିଛି ଅର୍ଥ ଚାନ୍ଦା କରି କଟକ ନେଇ ଯାଇଥିଲେ ମଧ୍ୟ ସମ୍ପୁର୍ଣ୍ଣ ରୋଗ ଭଲ କରିବା ପାଇଁ ୪୦/୫୦ ହଜାର ଟଙ୍କା ଖର୍ଚ୍ଚ ହେବ ବୋଲି ଜାଣିବାକୁ ପାଇବା ପରେ ନିଜ ପାଖରେ ଆବଶ୍ୟ ଅର୍ଥ ନଥିବାରୁ ପ୍ରାଥମିକ ଚିକିତ୍ସା କରି ଗାଁ ଫେରିଆସିଥିଲେ। ଏବେ ଅସହାୟ ଜଟାଳି ଘରେ ପଡି ରହିଥିବା ବେଳେ ରୋଗ କିପରି ଭଲ ହେବ ପରିବାର ଲୋକ ପ୍ରଶାସନର ସହାୟତାକୁ ଚାହିଁ ବସିଛନ୍ତି । ତାଙ୍କ ପରିବାର ଲୋକେ ଜିଲା ମୁଖ୍ୟ ଚିକିତ୍ସାଅଧିକାରିଙ୍କୁ ଭେଟିବା ସହ ଚାନ୍ଦବାଲି ତହସିଲିଦାରଙ୍କୁ ମଧ୍ୟ ଭେଟିଥିଲେ ତେବେ କୈାଣସି ସହାୟତା ମିଳିପାରିନଥିବା ପରିବାର ଲୋକ ପ୍ରକାଶ କରିଛନ୍ତି।
Popular Categories
Previous article
Next article