ନୂଆଦିଲ୍ଲୀ: ବର୍ଷାରେ ଭିଜିଥିବା ରନୱେରେ ଅବତରଣ କରିବା ସମୟରେ ଦୁଇଟି ବିମାନ ଅଳ୍ପକେ ଦୁର୍ଘଟଣାରୁ ବର୍ତ୍ତିଯାଇଛନ୍ତି। ସୁରଟ ଏବଂ ମାଙ୍ଗାଲୁରୁ ବିମାନବନ୍ଦରରେ ଏପରି ଘଟଣା ଘଟିଛି। ସୂଚନା ମୁତାବକ, ଭୋପାଳରୁ ସୁରଟରେ ପହଞ୍ଚିଥିବା ସ୍ପାଇସ୍ଜେଟର ଏକ ବିମାନ ଅବତରଣ କରିବା ସମୟରେ ରନୱେରୁ ଖସିଯାଇଥିଲା। ବିମାନଟି ରନୱେରୁ ବାହାରି ସେଫଟି ଏରିଆକୁ ଚାଲିଯାଇଥିଲା। ବର୍ଷା ଯୋଗୁ ସେଫଟି ଏରିଆ କାଦୁଅ ହୋଇଥିବାରୁ ବିମାନ ଚକ ମାଟିରେ ଫସିଯାଇଥିଲା। ଫଳରେ ବିମାନଟି ଅଟକି ଯାଇଥିଲା। ଏହି ସମୟରେ ବିମାନରେ ୪୭ ଯାତ୍ରୀ ଏବଂ କର୍ମଚାରୀ ଥିଲେ। ସମସ୍ତେ ସୁରକ୍ଷିତ ଥିବା ସୂଚନା ମିଳିଛି।
ସେହିପରି ଦୁବାଇରୁ ଆସିଥିବା ଏୟାର ଇଣ୍ଡିଆର ଏକ ବିମାନ ମାଙ୍ଗାଲୁରୁରେ ପହଞ୍ଚି ରନୱେରେ ଅବତରଣ କରିବା ବେଳେ ଅନୁରୂପ ଘଟଣା ଘଟିଥିଲା। ବିମାନ ଚକ ରନୱେରୁ ଖସିଯାଇ ଖୋଲା ପଡ଼ିଆକୁ ଚାଲିଯାଇଥିଲା।
