ମୁମ୍ବଇ : ବହୁ ପ୍ରତୀକ୍ଷିତ ଚଳଚ୍ଚିତ୍ର ‘ସୁପର-୩୦’ର ଟ୍ରେଲର୍ ଇତିମଧ୍ୟରେ ମୁକ୍ତିଲାଭ କରିଛି। ପ୍ରଶଂସକ ମହଲ ଏଥିରେ ହ୍ରିତିକ୍ଙ୍କ ଦମଦାର ଅଭିନୟର ଝଲକ୍ ଦେଖିଥିବାବେଳେ ସମୀକ୍ଷକ ମହଲ ମଧ୍ୟ ପ୍ରଶଂସା କରିଛନ୍ତି। କଙ୍ଗନା ରଣାୱତ୍ଙ୍କ ସହ ବିବାଦରେ ଛନ୍ଦି ହୋଇପଡ଼ିବା ପରେ ହ୍ରିତିକ୍ ଗଣମାଧ୍ୟମଠାରୁ ମୁହଁ ଲୁଚାଉଥିଲେ। କଙ୍ଗନାଙ୍କ ‘ମଣିକର୍ଣ୍ଣିକା’ ଚଳଚ୍ଚିତ୍ର ମୁକ୍ତିଲାଭ ସମୟରେ ସେ ‘ସୁପର ୩୦’ର ଟ୍ରେଲର୍ ମୁକ୍ତିଲାଭ କରିବାକୁ ଯୋଜନା କରିଥିଲେ। ହେଲେ ପ୍ରଶଂସକଙ୍କ ଗତିବିଧିକୁ ଠଉରାଇ ହ୍ରିତିକ୍ ବିଳମ୍ବ କରିବାକୁ ନିଷ୍ପତ୍ତି ନେଇଥିଲେ। ‘ସୁପର ୩୦’ରେ ସେ ଜଣେ ଗଣିତ ଶିକ୍ଷକ ଆନନ୍ଦ କୁମାରଙ୍କ ଚରିତ୍ରରେ ଅବତୀର୍ଣ୍ଣ। ଆଇଆଇଟି ଛାତ୍ରଛାତ୍ରୀଙ୍କୁ କୋଚିଂ ଦେବାରେ ସିଦ୍ଧହସ୍ତ ଏଇ ଶିକ୍ଷକ ଶେଷରେ ଗରିବ ଘରର ପିଲାଙ୍କ ପାଇଁ କିଭଳି ଲଢ଼ୁଛନ୍ତି, ତାହା ହିଁ ମୁଖ୍ୟ କାହାଣୀ। ସତ ଘଟଣା ଉପରେ ଆଧାରିତ ଏଇ ଚଳଚ୍ଚିତ୍ରରେ ହ୍ରିତିକ୍ ଖୁବ୍ ପରିଶ୍ରମ କରିଛନ୍ତି। ଚଳଚ୍ଚିତ୍ରଟି କିନ୍ତୁ ବହୁ ବିବାଦ ମଧ୍ୟ ଇତିମଧ୍ୟରେ ଗତି କରିସାରିଲାଣି। କାରଣ ନିର୍ଦେଶକ ବିକାଶ ବହଲ୍ କିଛି ମାସ ତଳେ ଯୁବତୀଙ୍କୁ ଅସଦାଚରଣ ପାଇଁ ବିବାଦକୁ ଆସିଥିଲେ। ପରେ କିନ୍ତୁ ସେ ନିର୍ଦୋଷ ସାବ୍ୟସ୍ତ ହୋଇଛନ୍ତି। ଏତେ ଘାତ ପ୍ରତିଘାତ ଦେଇ ଅତିକ୍ରମ କରିବା ପରେ ପୂରା ୟୁନିଟ୍ ଚାହୁଁଛି ଯେ ଅନ୍ତତଃ ଦର୍ଶକଙ୍କୁ ଚଳଚ୍ଚିତ୍ରଟି ପସନ୍ଦ ଆସୁ ଓ ବକ୍ସ ଅଫିସ୍ରେ ଜବରଦସ୍ତ ବ୍ୟବସାୟ କରୁ।
Popular Categories
Previous article
Next article