ନୂଆଦିଲ୍ଲୀ: ଗୁରୁବାର ସନ୍ଧ୍ୟାରେ ରାଷ୍ଟ୍ରପତି ଭବନରେ ପ୍ରଧାନମନ୍ତ୍ରୀ ଭାବେ ନରେନ୍ଦ୍ର ମୋଦୀ ଶପଥ ଗ୍ରହଣ କରିବେ। ଏହା ପୂର୍ବରୁ ମୋଦୀ ସକାଳେ ରାଜଘାଟଠାରେ ଜାତିର ପିତା ମହାତ୍ମା ଗାନ୍ଧୀଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ। ଏହା ପରେ ମୋଦୀ ଏବଂ ଅମିତ ଶାହ ଅଟଳ ସମାଧି ସ୍ଥଳରେ ପହଞ୍ଚି ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ। ସେଠାରୁ ମୋଦୀ ଦିଲ୍ଲୀ ସ୍ଥିତ ଜାତୀୟ ଯୁଦ୍ଧ ସ୍ମାରକୀ ସ୍ଥଳକୁ ଯାଇ ଶହୀଦମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ତାଙ୍କ ସହିତ ସେନାଧ୍ୟକ୍ଷ ବିପିନ ରାଓତ, ନୌସେନା ଅଧ୍ୟକ୍ଷ ସୁନୀଲ ଲାମ୍ବା ଏବଂ ବାୟୁସେନା ଉପାଧ୍ୟକ୍ଷ ଆର.କେ.ଏସ. ଭଦୋରିଆ ଉପସ୍ଥିତ ଥିଲେ।
ଏହା ପରେ ମୋଦୀ ଟ୍ବିଟ୍ କରି କହିଛନ୍ତି, ରାଜଘାଟରେ ବାପୁଙ୍କୁ ଶ୍ରଦ୍ଧାଞ୍ଜଳି ଅର୍ପଣ କଲି। ଚଳିତବର୍ଷ ବାପୁଙ୍କ ୧୫୦ତମ ଜୟନ୍ତୀ। ଏହି ବିଶେଷ ଅବସରରେ ଆମେ ବାପୁଙ୍କ ଆଦର୍ଶଗୁଡ଼ିକୁ ଆହୁରି ଅଧିକ ଲୋକପ୍ରିୟ କରାଇବା ଏବଂ ଆମକୁ ଗରିବ, ଦଳିତ ଲୋକଙ୍କୁ ସଶକ୍ତ କରିବା ଦିଗରେ ଉଦ୍ୟମ କରିବାକୁ ହେବ। ସେହିପରି ବାଜପେୟୀଙ୍କ ଉଦ୍ଦେଶ୍ୟରେ ମୋଦୀ ଟ୍ବିଟ୍ କରି ଲେଖିଛନ୍ତି, ଆମେ ପ୍ରତି ମୁହୂର୍ତ୍ତରେ ଅଟଳ ଜୀଙ୍କୁ ମନେ ପକାଉଛୁ। ସେ ଜୀବିତ ଥିଲେ ବିଜେପିକୁ ଲୋକଙ୍କ ସେବା କରିବାର ସୁଯୋଗ ମିଳିଥିବା ଦେଖି ଖୁସି ହୋଇଥାନ୍ତେ। ଅଟଳ ଜୀଙ୍କ ଜୀବନାଦର୍ଶ ଏବଂ ତାଙ୍କ କାର୍ଯ୍ୟରେ ଅନୁପ୍ରାଣିତ ହୋଇ ଆମେ ସୁଶାସନ କରିବା ଏବଂ ଲୋକଙ୍କ ଜୀବନ ବଦଳାଇବା ଦିଗରେ ଉଦ୍ୟମ କରିବୁ ବୋଲି ମୋଦୀ ଉଲ୍ଲେଖ କରିଛନ୍ତି।
