ଗାନ୍ଧୀନଗର: ଦେଶରେ ମଙ୍ଗଳବାର ୩ୟ ପର୍ଯ୍ୟାୟ ନିର୍ବାଚନ ଆରମ୍ଭ ହୋଇଛି। ୧୪ଟି ରାଜ୍ୟ ଏବଂ ୨ଟି କେନ୍ଦ୍ରଶାସିତ ଅଞ୍ଚଳର ୧୧୬ଟି ଲୋକସଭା ନିର୍ବାଚନମଣ୍ଡଳୀରେ ଭୋଟଗ୍ରହଣ ଅନୁଷ୍ଠିତ ହେଉଛି। ଗୁଜରାଟ ୨୬ଟି ଲୋକସଭା ଆସନ ପାଇଁ ମତଦାନ ଚାଲିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗାନ୍ଧୀନଗର ଅନ୍ତର୍ଗତ ସନିପ ବୁଥରେ ପହଞ୍ଚି ସକାଳେ ମତଦାନ କରିଛନ୍ତି। ତେବେ ଏହା ପୂର୍ବରୁ ମୋଦୀ ତାଙ୍କ ମା’ ହୀରାବେନଙ୍କୁ ଭେଟିବାକୁ ଘରେ ପହଞ୍ଚିଥିଲେ। ସେଠାରେ ମା’ଙ୍କ ପାଦ ଛୁଇଁ ଆଶୀର୍ବାଦ ନେଇଥିଲେ। ଏହି ସମୟରେ ତାଙ୍କ ମା’ ତାଙ୍କ ମଥାରେ ବିଜୟ ଟୀକା ଲଗାଇ ମିଠା ଖୁଆଇଥିଲେ। ମୋଦୀ ବି ନିଜ ହାତରେ ମା’ଙ୍କୁ ମିଠା ଖୁଆଇଥିଲେ। ଆସିବା ବେଳେ ମୋଦୀଙ୍କୁ ତାଙ୍କ ମା’ ଏକ ସ୍କାର୍ଫ ଦେଇଥିଲେ। ମୋଦୀ ତାଙ୍କୁ ହାତରେ ଧରି ଭୋଟ ଦେବାକୁ ବାହାରିଥିଲେ। ଏହା ସହିତ ସେ ନିଜ ପଡ଼ୋଶୀମାନଙ୍କୁ ବି ଭେଟିଥିଲେ।
୨୦୧୪ ଲୋକସଭା ନିର୍ବାଚନ ଫଳାଫଳ ପ୍ରକାଶ ପାଇବା ପରେ ମଧ୍ୟ ମୋଦୀ ମା’ଙ୍କୁ ଭେଟିବାକୁ ଘରକୁ ଯାଇଥିଲେ। ଦୀର୍ଘ ସମୟ ପର୍ଯ୍ୟନ୍ତ ସେ ମା’ଙ୍କ ପାଖରେ ରହିଥିଲେ। ମା’ ତାଙ୍କ ସହିତ ବହୁ ସମୟ ପର୍ଯ୍ୟନ୍ତ କଥା ହୋଇଥିଲେ। ଏଥିସହ ତାଙ୍କୁ ତିଳକ ଲଗାଇବା ସହ ଆଶୀର୍ବାଦ ଦେଇଥିଲେ।
