ନୂଆଦିଲ୍ଲୀ: ପଶ୍ଚିମବଙ୍ଗରେ ବିଜେପି ନେତାମାନଙ୍କୁ ତୃଣମୂଳ କଂଗ୍ରେସ(ସିଏମସି) କର୍ମୀମାନେ ଆକ୍ରମଣ କରୁଥିବା ବିଜେପି ଅଭିଯୋଗ କରିଆସୁଛି। ଦଳ ପକ୍ଷରୁ ଏ ନେଇ ଅନେକ ଥର ଆପତ୍ତି ଉଠାଯିବା ସହ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ‘ଦିଦିଗିରି’ ଯୋଗୁ ଏଭଳି ଘଟଣା ଘଟୁଥିବା କୁହାଯାଉଛି। ତେବେ ରବିବାର ଏକ ଟେଲିଭିଜନ ଶୋ’ରେ ବିତର୍କ ବେଳେ ଜଣେ ବିଜେପି ପ୍ରାର୍ଥୀଙ୍କୁ ଆକ୍ରମଣ ଧମକ ମିଳିଛି। ବିତର୍କରେ ଭାଗ ନେଇଥିବା ତୃଣମୂଳ କଂଗ୍ରେସ(ଟିଏମସି)ର ମନ୍ତ୍ରୀ ରବୀନ୍ଦ୍ର ନାଥ ଘୋଷ ଏହି ଆକ୍ରମଣ ଧମକ ଦେଇଛନ୍ତି। ଏହାକୁ ନେଇ ବିତର୍କ ପରେ ସେଠାରେ ଉଭୟ ଦଳର ସମର୍ଥକଙ୍କ ମଧ୍ୟରେ ମାରପିଟ ସହ ଚେୟାର ଫିଙ୍ଗାଫୋପଡ଼ା ହୋଇଥିଲା। ଏହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି।
ପଶ୍ଚିମବଙ୍ଗର ଟିଏମସି ମନ୍ତ୍ରୀ ରବୀନ୍ଦ୍ର ନାଥ ଘୋଷ ନିଜ କାର୍ଯ୍ୟକଳାପକୁ ନେଇ ବିବାଦୀୟ ମନ୍ତ୍ରୀ ଭାବେ ଜଣାଶୁଣା। ରବିବାର ଏକ ଟିଭି ଚ୍ୟାନେଲରେ ବିତର୍କ ଚାଲିଥିବାବେଳେ କୁଚ୍ ବିହାରର ବିଜେପି ପ୍ରାର୍ଥୀ ନିତିଶ ପ୍ରାମାଣିକଙ୍କ ଏକ ମନ୍ତବ୍ୟ ଉପରେ ରବୀନ୍ଦ୍ର ଉତ୍ତେଜିତ ହୋଇପଡ଼ି ତାଙ୍କ ଉପରକୁ ହାତ ଉଠାଇଥିଲେ। କାର୍ଯ୍ୟକ୍ରମ ସରିବା ପରେ ଆକ୍ରମଣ କରିବା ନେଇ ତାଙ୍କୁ ଧମକ ଦେଇଥିଲେ। ଡିବେଟ ସରିବାର କିଛି ସମୟ ମଧ୍ୟରେ ଡିବେଟ ଚାଲିଥିବା ସ୍ଥାନରେ ଉଭୟ ନେତାଙ୍କ ସମର୍ଥକମାନେ ମୁହାଁମୁହିଁ ହୋଇଥିଲେ।
