ଲକ୍ଷ୍ମୌ: ପୁଲୱାମା ଆକ୍ରମଣ ପରଠାରୁ କାଶ୍ମୀର ନାଗରିକଙ୍କ ଉପରେ ବିଭିନ୍ନ ରାଜ୍ୟରେ ଆକ୍ରମଣ ଜାରି ରହିଛି। ଏହି ପରିପ୍ରେକ୍ଷୀରେ ଉତ୍ତରପ୍ରଦେଶର ଲକ୍ଷ୍ନୌରେ ଜଣେ କାଶ୍ମୀରୀ ବ୍ୟବସାୟୀଙ୍କୁ ମାଡ଼ ମରାଯାଇଛି। ଆକ୍ରମଣର ଶିକାର ହୋଇଛନ୍ତି ମହମ୍ମଦ ଅଫଜଲ ନାୟକ। ଜାମ୍ମୁ-କାଶ୍ମୀର କୁଲଗାମର ଚିଲର ନୁରାବାଗ ଅଞ୍ଚଳରେ ତାଙ୍କ ଘର। ସେ ଲକ୍ଷ୍ନୌର ହସନଗଞ୍ଜ ଅନ୍ତର୍ଗତ ଡାଲିଗଞ୍ଜ ପୋଲ ଉପରେ ଡ୍ରାଏ ଫ୍ରୁଟ୍ସ ବିକ୍ରି କରନ୍ତି। ବୁଧବାର ସେ ବ୍ୟବସାୟ କରୁଥିବାବେଳେ ସ୍ଥାନୀୟ ୩/୪ ଜଣ ଯୁବକ ପହଞ୍ଚି ତାଙ୍କୁ ଏଠାରେ କ’ଣ ପାଇଁ ବ୍ୟବସାୟ କରୁଛ ବୋଲି ପଚାରିଥିଲେ ଏବଂ ଅଫଜଲ କିଛି ଉତ୍ତର ଦେବା ପୂର୍ବରୁ ସେମାନେ ତାଙ୍କୁ ମାରପିଟ କରିଥିଲେ। ଏହା ଦେଖି ସ୍ଥାନୀୟ ଲୋକମାନେ ବିରୋଧ କରିବାରୁ ଆକ୍ରମଣକାରୀମାନେ ଖସି ପଳାଇଥିଲେ। ତେବେ ଅଫଜଲଙ୍କୁ ମାଡ଼ ମରାଯାଉଥିବା ବେଳେ କେତେଜଣ ଲୋକ ଏହାର ଭିଡିଓ କରି ଭାଇରାଲ କରିଥିବା ଦେଖିବାକୁ ମିଳିଛି।
ଅଫଜଲ ଘଟଣା ସମ୍ପର୍କରେ ସ୍ଥାନୀୟ ଥାନାରେ ଏତଲା ଦେବା ପରେ ପୁଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ଏହି ଘଟଣା କେତେକ ଜାତୀୟ ସ୍ତରୀୟ ଗଣମାଧ୍ୟମରେ ପ୍ରସାରିତ ହେବା ପରେ ବିଭିନ୍ନ ମହଲରେ ନିନ୍ଦା କରାଯାଇଛି।
