ଗାନ୍ଧୀନଗର: ଗୁଜରାଟ ମୁଖ୍ୟମନ୍ତ୍ରୀ ଭୂପେନ୍ଦ୍ର ପଟେଲ ଶୁକ୍ରବାର ତାଙ୍କ ମନ୍ତ୍ରିମଣ୍ଡଳର ସଂପ୍ରସାରଣ କରିଛନ୍ତି। ସ୍ଥାନୀୟ ମହାତ୍ମା ମନ୍ଦିର ପରିସରରେ ଆୟୋଜିତ ଉତ୍ସବରେ ରାଜ୍ୟପାଳ ଆଚାର୍ଯ୍ୟ ଦେବବ୍ରତ ସବୁ ମନ୍ତ୍ରୀଙ୍କୁ ପଦ ଓ ଗୋପନୀୟତାର ଶପଥପାଠ କରାଇଛନ୍ତି। କ୍ୟାବିନେଟରେ ନୂଆ ୧୯ ମନ୍ତ୍ରୀଙ୍କୁ ସାମିଲ କରାଯାଇଥିବାବେଳେ ମନ୍ତ୍ରୀଙ୍କ ସଂଖ୍ୟା ୨୬କୁ ବୃଦ୍ଧି ପାଇଛି। ଚାରିବର୍ଷର ବ୍ୟବଧାନ ପରେ ପୁଣି ଉପ ମୁଖ୍ୟମନ୍ତ୍ରୀ ପଦ ସୃଷ୍ଟି କରାଯାଇଥିବାବେଳେ ହର୍ଷ ସାଙ୍ଗ୍ଭିଙ୍କୁ ଏହି ପଦରେ ଅବସ୍ଥାପିତ କରାଯାଇଛି। ସାଙ୍ଗ୍ଭୀ ସୁରଟର ମାଜୁରା ଆସନରୁ ଦୁଇ ଥର ବିଧାୟକ ନିର୍ବାଚିତ ହୋଇସାରିଥିବାବେଳେ ଇତିପୂର୍ବରୁ ଭୂପେନ୍ଦ୍ରଙ୍କ କ୍ୟାବିନେଟରେ ଗୃହ ରାଷ୍ଟ୍ରମନ୍ତ୍ରୀ ଦାୟିତ୍ବ ତୁଲାଉଥିଲେ।
ଅପରପକ୍ଷରେ କ୍ରିକେଟର ରବୀନ୍ଦ୍ର ଜାଡେଜାଙ୍କ ପତ୍ନୀ ରିଭାଭା ଜାଡେଜାଙ୍କୁ ପ୍ରଥମ ଥର ମନ୍ତ୍ରିମଣ୍ଡଳରେ ସାମିଲ କରାଯାଇଛି। ରିଭାଭା ଜାମନଗର (ନର୍ଥ) ଆସନରୁ ବିଜେପି ପ୍ରାର୍ଥୀଭାବେ ବିଧାନସଭାକୁ ନିର୍ବାଚିତ ହୋଇଛନ୍ତି। ରିଭାଭାଙ୍କୁ ରାଷ୍ଟ୍ରମନ୍ତ୍ରୀ ପାହ୍ୟା ମିଳିବ ବୋଲି ଜଣାପଡିଛି। ପୂର୍ବ କ୍ୟାବିନେଟରେ ମନ୍ତ୍ରୀ ଥିବା କାନୁଭାଇ ପଟେଲ, ଋଷିକେଶ ପଟେଲ, କୁମ୍ଭାରଜୀ ବାଭାଲିଆ, ହର୍ଷ ସାଙ୍ଗ୍ଭି, ପ୍ରଫୁଲ୍ଲ ପାନସେରିୟା ଏବଂ ପୁରୁଷୋତ୍ତମ ସୋଲାଙ୍କିଙ୍କୁ ପୁଣି ମନ୍ତ୍ରିମଣ୍ଡଳରେ ସାମିଲ କରାଯାଇଛି। ଅପରପକ୍ଷରେ ନୂଆ ମନ୍ତ୍ରୀଙ୍କ ମଧ୍ୟରେ ଜିତୁ ଭଗ୍ନାନି, ଅର୍ଜୁନ ମୋଧୱାଡିଆ ଓ ମନୀଷା ଭକିଲ ଅନ୍ୟତମ। ୨୦୨୭ରେ ଗୁଜରାଟରେ ବିଧାନସଭା ନିର୍ବାଚନ ଅନୁଷ୍ଠିତ ହେବ।
