ସମାଜ ଡିଜିଟାଲ ଡେସ୍କ: ରାଜଧାନୀ ଭୁବନେଶ୍ଵରରେ ଆଇନଶୃଙ୍ଖଳା ପରିସ୍ଥିତି ଦିନକୁ ଦିନ ବିଗିଡ଼ିବାରେ ଲାଗିଛି। ହତ୍ୟା, ରାହାଜାନୀ, ଚୋରି, ଦୁଷ୍କର୍ମ, ଆକ୍ରମଣ, ଲୁଟ ଆଦି ସହରବାସୀଙ୍କୁ ଚିନ୍ତାରେ ପକାଇଛି। ଯାହାକୁ ନେଇ ଉଦବେଗ ପ୍ରକାଶ କରିଛନ୍ତି ବିରୋଧୀ ଦଳ ନେତା ତଥା ନବୀନ ପଟ୍ଟନାୟକ।
ସୋମବାର ଗୋଟିଏ ଦିନରେ ୨ଟି ହତ୍ୟାକାଣ୍ଡ ସମେତ ଆକ୍ରମଣ ଏବଂ ଲୁଟ୍ ଘଟଣା ସହରବାସୀଙ୍କୁ ଭୟଭୀତ କରାଇଦେଇଛି। ଚନ୍ଦ୍ରଶେଖରପୁର ଅଞ୍ଚଳରେ ଯୁବକଙ୍କୁ ବୀଭତ୍ସ ହତ୍ୟା କରାଯାଇଛି। ସେହିପରି ଏମ୍ସର ଜଣେ କର୍ମଚାରୀଙ୍କୁ ବି ହତ୍ୟା କରାଯାଇଛି। ସୋମବାର ଏହି ଦୁଇଟି ହତ୍ୟାକାଣ୍ଡ ଘଟିଛି। ଏହା ସହିତ ଜଣେ ଶିକ୍ଷକଙ୍କୁ ଦୁର୍ବୃତ୍ତ ଗୋଡ଼ାଇ ଗୋଡ଼ାଇ ଆକ୍ରମଣ କରିଛନ୍ତି। ସେହିପରି ନୟାପଲ୍ଲୀ ଅଞ୍ଚଳର ଏକ ମନ୍ଦିରରୁ ଲକ୍ଷାଧିକ ଟଙ୍କାର ଅଳଙ୍କାର ବି ଲୁଟ୍ ହୋଇଛି। ଏସବୁ ଘଟଣା ରାଜଧାନୀର ବିଗିଡ଼ି ଯାଇଥିବା ଆଇନଶୃଙ୍ଖଳା ପରିସ୍ଥିତିକୁ ଦର୍ଶାଉଛି।
ଏସବୁ ଘଟଣାକୁ ନେଇ ନବୀନ ଉଦବେଗ ପ୍ରକାଶ କରି କହିଛନ୍ତି, କେବଳ ଘଟଣା ଘଟିବା ପରେ ବିଜେପି ସରକାରରେ ପୁଲିସ ପ୍ରଶାସନ କ୍ରିୟାଶୀଳ ହେବା ଅପରାଧୀଙ୍କୁ ଭୟଶୂନ୍ୟ କରିଦେଉଛି। କଥା କଥାକେ ଦିବାଲୋକରେ ଗୁଳି ଫୁଟୁଛି, ଅପରାଧୀ ଅବାଧ ଭାବେ ବୁଲୁଛନ୍ତି। ରାଜ୍ୟର ଆଇନଶୃଙ୍ଖଳା ବିପର୍ଯ୍ୟସ୍ତ ହୋଇପଡ଼ୁଥିବାବେଳେ ବିଜେପି ସରକାର ସଜାଗ ନ ହେବା ସବୁଠୁ ଆଶ୍ଚର୍ଯ୍ୟର ବିଷୟ। ଲୋକଙ୍କ ସୁରକ୍ଷାକୁ ଅଗ୍ରାଧିକାର ଦେଇ ଏକ ଭୟମୁକ୍ତ ପରିବେଶ ସୁନିଶ୍ଚିତ କରିବା ପାଇଁ ସରକାର କଠୋର କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ।
