ସମାଜ ଡିଜିଟାଲ ଡେସ୍କ: ପ୍ରଧାନ ବିଚାରପତି(ସିଜେଆଇ) ବି.ଆର. ଗଭଇଙ୍କୁ ଜୋତା ଫିଙ୍ଗିବାକୁ ଉଦ୍ୟମ କରିଥିବା ଓକିଲ ରାକେଶ କିଶୋରଙ୍କ ଲାଇସେନ୍ସ ରଦ୍ଦ କରିଦିଆଯାଇଛି। ବାର କାଉନସିଲ ଅଫ୍ ଇଣ୍ଡିଆ(ବିସିଆଇ) ତରଫରୁ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ନିଲମ୍ବନ ସମୟ ମଧ୍ୟରେ ତାଙ୍କୁ କୌଣସି କୋର୍ଟ, ଟ୍ରିବ୍ୟୁନାଲ ତଥା ପ୍ରାଧିକରଣରେ ଓକିଲାତି କରିବାକୁ ଅନୁମତି ମିଳିବ ନାହିଁ।
ବିସିଆଇ ପକ୍ଷରୁ କୁହାଯାଇଛି ଯେ, ଏହି ମାମଲାରେ ରାକେଶଙ୍କ ବିରୋଧରେ ଅନୁଶାସନମୂଳକ କାର୍ଯ୍ୟାନୁଷ୍ଠାନ ଆରମ୍ଭ ହେବ। କାହିଁକି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ହେବ ନାହିଁ ସେ ନେଇ ୧୫ ଦିନ ଭିତରେ କାରଣଦର୍ଶାଅ ନୋଟିସ ମଧ୍ୟ ଜାରି କରାଯିବ। ନୋଟିସର ଉତ୍ତର ଏବଂ ତଦନ୍ତ ଆଧାରର କାଉନସିଲ ପକ୍ଷରୁ ଉଚିତ ଏବଂ ଆବଶ୍ୟକ ଆଦେଶ ଜାରି କରାଯିବ।
ଅନ୍ୟପଟେ, ରାକେଶଙ୍କ ବିରୋଧରେ କୌଣସି ସିଜେଆଇ କାର୍ଯ୍ୟାନୁଷ୍ଠାନ ଚାହୁଁ ନ ଥିବା ବିଶେଷ ସୂତ୍ରରୁ ସୂଚନା ମିଳିଛି। ଘଟଣା ଉପରେ ନୀରବ ରହିବାକୁ ସିଜେଆଇ ରେଜିଷ୍ଟ୍ରୀ ଅଧିକାରୀମାନଙ୍କୁ କହିଥିବା ଜଣାପଡ଼ିଛି।
