ଲଣ୍ଡନ: ରୁଷ୍-ୟୁକ୍ରେନ ଯୁଦ୍ଧ ବନ୍ଦ କରିବାକୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଉଦ୍ୟମ କରୁଥିଲେ ସୁଦ୍ଧା ଏହା ସମ୍ଭବ ହୋଇପାରୁନାହିଁ। ସଂପ୍ରତି ବ୍ରିଟେନ ଗସ୍ତରେ ଯାଇଥିବାବେଳେ ଟ୍ରମ୍ପ ଏଥିପାଇଁ ରୁଷ୍ ରାଷ୍ଟ୍ରପତି ଭ୍ଲାଡିମିର ପୁଟିନଙ୍କୁ ପରୋକ୍ଷରେ ଦାୟୀ କରିଛନ୍ତି। ପୁଟିନ ଏହି ପ୍ରସଙ୍ଗରେ ତାଙ୍କୁ ଅପଦସ୍ତ କରିଥିବା ଟ୍ରମ୍ପ କହିଛନ୍ତି। ଗତମାସରେ ଆଲାସ୍କାରେ ଆୟୋଜିତ ଏକ ବୈଠକରେ ଉଭୟ ଟ୍ରମ୍ପ ଓ ପୁଟିନ ପରସ୍ପରକୁ ଭେଟିଥିବାବେଳେ ଯୁଦ୍ଧ ପ୍ରସଙ୍ଗରେ ଆଲୋଚନା କରିଥିଲେ। ଏହି ସମୟରେ ଯୁଦ୍ଧ ବନ୍ଦ ପାଇଁ ୟୁକ୍ରେନ ରାଷ୍ଟ୍ରପତି ଭୋଲଡୋମୀର ଜେଲେନ୍ସ୍କିଙ୍କ ସହ ଆଲୋଚନା କରିବାକୁ ଟ୍ରମ୍ପ କୁଆଡେ ପୁଟିନଙ୍କୁ ଅନୁରୋଧ କରିଥିଲେ।
ତେବେ ଆଲୋଚନା ପାଇଁ ପୁଟିନ ଯେଉଁ ସର୍ତ୍ତ ରଖିଥିଲେ ତାହା ୟୁକ୍ରେନ ପାଇଁ ଗ୍ରହଣୀୟ ହୋଇନଥିଲା। ଟ୍ରମ୍ପ ଆହୁରି କହିଛନ୍ତି କ୍ଷମତାକୁ ଆସିବାପରେ ସେ ଭାବିଥିଲେ ଯେ ଏହି ଯୁଦ୍ଧ ବନ୍ଦ କରିବା ତାଙ୍କ ପାଇଁ ସହଜ ହେବ। ତେବେ ବାସ୍ତବ ସ୍ଥିତି ଭିନ୍ନ ମୋଡ ନେଉଥିବା ସେ କହିଛନ୍ତି। ୨୦୨୨ ଫେବୃଆରୀରୁ ଆରମ୍ଭ ହୋଇଥିବା ରୁଷ୍-ୟୁକ୍ରେନ ଯୁଦ୍ଧ ଏବେ ମଧ୍ୟ ଚାଲିଛି। ଦ୍ବିତୀୟ ଥର କ୍ଷମତାକୁ ଆସିବା ପୂର୍ବରୁ ଟ୍ରମ୍ପ କହିଥିଲେ ଯେ ସେ ଯଦି ରାଷ୍ଟ୍ରପତି ନିର୍ବାଚିତ ହୁଅନ୍ତି, ତେବେ ଚବିଶ ଘଣ୍ଟା ମଧ୍ୟରେ ରୁଷ୍-ୟୁକ୍ରେନ ଯୁଦ୍ଧ ବନ୍ଦ କରିଦେବେ। ଇତିମଧ୍ୟରେ ଟ୍ରମ୍ପ କ୍ଷମତା ଅକ୍ତିିଆର କରିବାର ପ୍ରାୟ ଆଠ ମାସ ଅତିକ୍ରାନ୍ତ ହୋଇସାରିଥିଲେ ସୁଦ୍ଧା ରୁଷ୍ କିମ୍ବା ୟୁକ୍ରେନ ଯୁଦ୍ଧ ବନ୍ଦ ପାଇଁ କୌଣସି ଫଳପ୍ରଦ ନିଷ୍ପତ୍ତି ନେଇପାରୁନାହାନ୍ତି। ବ୍ରିଟିଶ ପ୍ରଧାନମନ୍ତ୍ରୀ କିଏର ଷ୍ଟାର୍ମର ମଧ୍ୟ ଏହି ପ୍ରସଙ୍ଗରେ ପୁଟିନଙ୍କୁ ସମାଲୋଚନା କରିଛନ୍ତି।
