ଲକ୍ଷ୍ନୌ: ତଲାକ୍ ଦେବାରୁ ଉତ୍ତର ପ୍ରଦେଶ ରାମପୁରରେ କୋର୍ଟ ବାହାରେ ଜଣେ ମହିଳା ସ୍ବାମୀ ଓ ଶ୍ବଶୁରଙ୍କୁ ଚପଲରେ ମାଡ ମାରିଛନ୍ତି। ଏହି ଘଟଣାର ଦୃଶ୍ୟ ସାମାଜିକ ଗଣମାଧ୍ୟମରେ ଘୂରିବୁଲୁଛି। ମହିଳାଙ୍କୁ ତାଙ୍କ ପତି ମାରପିଟ୍ କରିବା ସହିତ ଘରୁ ତଡି ଦେଇଥିଲେ। କୋର୍ଟର ଆଶ୍ରୟ ନେବା ପରେ ତାଙ୍କୁ କେସ୍ ଫେରାଇନେବା ପାଇଁ ବାଧ୍ୟ କରୁଥିବାରୁ ପତିଙ୍କୁ ଚପଲରେ ମାଡ ମାରିଥିବା ମହିଳା ଜଣକ କହିଛନ୍ତି।
୨୦୧୮ରେ ମହିଳାଙ୍କ ବିବାହ ହୋଇଥିଲା। ଲଗାତାର ଦୁଇଟି ଝିଅ ହେବା ପରେ ପତିଙ୍କ ପରିବାର ଲୋକେ ମାନସିକ ଅତ୍ୟାଚାର ଦେଉଥିବା ସହ ଯୌତୁକ ଦାବି କରୁଥିଲେ। ଶେଷରେ ତାଙ୍କୁ ଓ ତାଙ୍କ ଝିଅଙ୍କୁ ଘରୁ ତଡିଦେବା ପରେ ସେ ଭରଣପୋଷଣ ପାଇଁ କୋର୍ଟରେ କେସ୍ କରିଥିଲେ। ଶୁଣାଣି ନିମନ୍ତେ ଶୁକ୍ରବାର କୋର୍ଟ ଆସିଥିବା ସମୟରେ ତାଙ୍କୁ କେସ୍ ଫେରାଇନେବା ପାଇଁ ଶ୍ବଶୁର ବାଧ୍ୟ କରିବା ସହ ପତି ତିନିଥର ‘ତଲାକ୍’ କହି ଆକ୍ରମଣ କରିବାକୁ ଉଦ୍ୟମ କରିଥିଲେ। ଏହି ସମୟରେ ଚପଲ ଖୋଲି ପତିଙ୍କୁ ଗୋଡାଇ ଗୋଡାଇ ମାରିଥିଲେ ମହିଳା। ନିଜ ଜୀବନ ରକ୍ଷା କରିବାକୁ ଏଭଳି ପଦକ୍ଷେପ ନେଇଥିବା ଗଣମାଧ୍ୟମ ଆଗରେ ମହିଳାଜଣକ କହିଛନ୍ତି।
