ପ୍ୟାରିସ – ନେପାଳରେ ସମ୍ପ୍ରତି ହୋଇଥିବା ବିକ୍ଷୋଭ ପରେ ଏବେ ଫ୍ରାନ୍ସରେ ମଧ୍ୟ ବିଦ୍ରୋହ ପରିସ୍ଥିତି ସୃଷ୍ଟି ହୋଇଛି। ରାଜଧାନୀ ପ୍ୟାରିସରେ ହଜାର ହଜାର ଲୋକ ସରକାରଙ୍କ ବିରୋଧରେ ରାସ୍ତାକୁ ଓହ୍ଲାଇଛନ୍ତି।
ସବୁଠାରୁ ଆଶ୍ଚର୍ଯ୍ୟଜନକ କଥା ହେଲା, ଏହି ବିକ୍ଷୋଭରେ ଫିଲିସ୍ତିନୀ ପତାକା ମଧ୍ୟ ଉଡ଼ାଯାଇଛି । ଅନେକ ଅଞ୍ଚଳରେ ବିକ୍ଷୋଭକାରୀମାନେ ନିଆଁ ଲଗାଇବା ଓ ଭାଙ୍ଗରୁଜା କରିଛନ୍ତି । ଧୂଆଁର ଗୁଣ୍ଡ ସାରା ପରିବେଶକୁ ଉତ୍ତେଜନାପୂର୍ଣ୍ଣ କରିଦେଇଥିଲା। ‘ବ୍ଲକ ଏଭ୍ରିଥିଙ୍ଗ’ ନାମରେ ଚାଲିଥିବା ଏହି ଆନ୍ଦୋଳନ ଫ୍ରାନ୍ସରେ ଅସ୍ଥିରତା ଆଣି ଦେଇଛି ।
ବିଭିନ୍ନ ସ୍ଥାନରେ ରାସ୍ତାରେ ଜନତା ପୁଲିସ ସହ ସଂଘର୍ଷ ହୋଇଥିଲା। ପରିସ୍ଥିତି ଅଣାୟତ ହୋଇଥିଲା। ଏପର୍ଯ୍ୟନ୍ତ ୨୫୦ରୁ ଅଧିକ ଲୋକଙ୍କୁ ଗିରଫ କରାଯାଇଛି । ଫ୍ରାନ୍ସର ଗଣମାଧ୍ୟମ ଅନୁସାରେ, ବିକ୍ଷୋଭରେ ବହୁ ସଂଖ୍ୟାରେ ଅବୈଧ ପ୍ରବାସୀ ମଧ୍ୟ ସାମିଲ ଅଛନ୍ତି ।
ବିକ୍ଷୋଭକାରୀମାନେ ସରକାରୀ ନୀତିକୁ ବିରୋଧ କରି ‘ବ୍ଲକ ଏଭ୍ରିଥିଙ୍ଗ’ ସ୍ଲୋଗାନ ଦେଇଥିଲେ । ନେପାଳ ଓ ଫ୍ରାନ୍ସର ଘଟଣାଗୁଡ଼ିକରେ ଏକ ଅଜଣା ସମାନତା ରହିଛି । କାଠମାଣ୍ଡୁ ପରି ପ୍ୟାରିସର ରାସ୍ତାଘାଟରେ ମଧ୍ୟ ବିକ୍ଷୋଭକାରୀ ଓ ପୁଲିସ ମଧ୍ୟରେ ସଂଘର୍ଷ ହୋଇଛି । ବିକ୍ଷୋଭକାରୀମାନେ ବିଭି ଦୋକାନ ଓ ଗାଡ଼ିରେ ନିଆଁ ଲଗାଇଛନ୍ତି । ଲୋକଙ୍କର କ୍ରୋଧ ହିଂସାରେ ପରିଣତ ହୋଇଛି। ଫ୍ରାନ୍ସରେ ରାଷ୍ଟ୍ରପତି ଇମାନୁଏଲ ମାକ୍ରୋଙ୍କ ନୀତି ବିରୁଦ୍ଧରେ ଏହା ସବୁଠାରୁ ବଡ଼ ଆନ୍ଦୋଳନ ବୋଲି କୁହାଯାଉଛି। ବିଶେଷ କଥା ହେଲା, ନେପାଳଠାରୁ ସାତ ହଜାର କିଲୋମିଟର ଦୂରରେ ଥିବା ଫ୍ରାନ୍ସରେ ସେହି ଏକାପରି ଦୃଶ୍ୟ ପୁନରାବୃତ୍ତି ହୋଇଛି।
