ପାତ୍ରପୁର: ଗଞ୍ଜାମ ଜିଲା ପାତ୍ରପୁର ବ୍ଲକ ଅନ୍ତର୍ଗତ ବାଦପୁର ପଞ୍ଚାୟତର ଭୈରପୁର ଏବଂ ରାଜପୁର ଗ୍ରାମରେ ପହଞ୍ଚିଛି ଦୁଇ ଦାଦନ ଶ୍ରମିକଙ୍କ ମୃତଦେହ। ରବିବାର ରାତିରେ ଜଣକ ମୃତଦେହ ପହଞ୍ଚିଥିବାବେଳେ ଏହାର ୧୦ ଘଣ୍ଟା ନ ପୂରୁଣୁ ସୋମବାର ସକାଳେ ଆଉ ଏକ ମୃତଦେହ ଆସି ପହଞ୍ଚିଛି। ଯାହାକୁ ନେଇ ଅଞ୍ଚଳରେ ଶୋକର ଛାୟା ଖେଳିଯାଇଛି।
ମୃତ ଶ୍ରମିକ ଦୁହେଁ ହେଲେ ଭୈରପୁରର ଉଜ୍ଜଳ ପ୍ରଧାନ ଏବଂ ରାଜପୁର ଗ୍ରାମର ବିଜୟ ଦଳାଇ। ଉଜ୍ଜଳ ୨୦ ବର୍ଷ ହେଲା ଚେନ୍ନାଇର ଏକ ପ୍ଲାଣ୍ଟରେ ଅପରେଟର ଭାବେ କାର୍ଯ୍ୟ କରୁଥିଲେ। ଗତ ୫ ତାରିଖରେ ସେ କାମରୁ ଫେରି ଘରେ ଶୋଇଥିଲେ। ସକାଳୁ କବାଟ ନ ଖୋଲିବାରୁ ପାଖରେ ଥିବା ସାଙ୍ଗମାନେ କବାଟ ଖୋଲିବା ବେଳେ ତାଙ୍କ ମୃତଦେହ ସନ୍ଦେହ ଜନକ ଅବସ୍ଥାରେ ଥିବା ଦେଖି ପୁଲିସକୁ ଖବର ଦେଇଥିଲେ। ପୁଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପରେ ସମ୍ପର୍କୀୟଙ୍କୁ ହସ୍ତାନ୍ତର କରିଥିଲା। ରବିବାର ରାତିରେ ତାଙ୍କ ମୃତଦେହ ଆମ୍ବୁଲାନ୍ସ ଯୋଗେ ଗ୍ରାମରେ ପହଞ୍ଚିବା ପରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା।
ଅନ୍ୟପଟେ ବିଜୟ ଦଳାଇ ୧୫ ବର୍ଷ ହେଲା ହାଇଦ୍ରାବାଦର ଏକ କମ୍ପାନୀରେ ୱେଲ୍ଡର ଭାବେ କାର୍ଯ୍ୟ କରୁଥିଲେ । ଗତକାଲି ରବିବାର ଛୁଟି ଥିବାରୁ ଖାଇ ପିଇ ଘରେ ଶୋଇଥିବା ବେଳେ ସାଙ୍ଗମନେ ତାଙ୍କୁ ଉଠାଇଥିଲେ ।ତେବେ ସେ ନ ଉଠିବାରୁ ତାଙ୍କୁ ନିକଟ ଡାକ୍ତରଖାନାକୁ ନେଇଥିଲେ। ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ସୋମବାର ସକାଳେ ଆମ୍ବୁଲାନ୍ସ ଯୋଗେ ତାଙ୍କ ମୃତଦେହ ଗ୍ରାମରେ ପହଞ୍ଚିଥିଲା।
